“Andijon” - “So'g'diyona”: Autsayder va ochkosi teng jamoalar bahsi

Bugun esa turdan o'rin olgan qolgan bellashuvlar o'tkaziladi. Andijonda bo'ladigan “Andijon” va “So'g'diyona” o'rtasidagi to'qnashuvni hech ikkilanmay atusayderlar jangi desak bo'ladi. CHunki har ikki jamoa ham turnir jadvalida pastki o'rinlarda boryapti.

“Andijon” 13, “So'g'diyona” 14-o'rinni egallab turibdi. Ikkala klub hisobida ham bir xil - to'rttadan ochko mavjud. “Andijon” o'z maydonida “Buxoro”ni mag'lub etib, safarda “Olmaliq” bilan durang o'ynagan bo'lsa, “So'g'diyona” o'z maydonida “Neftchi”ni engdi va “Mashal” bilan durang qayd etdi.

“Andijon” “Buxoro”ni mag'lubiyatga uchratganidan so'ng ketma-ket uch uchrashuvda imkoniyatni boy berdi. “So'g'diyona” esa chempionatning 1-turidagi durangni hisobga olmaganda ketma-ket ettita o'yinda mag'lub bo'ldi va “Neftchi” ustidan g'alaba qozonganidan so'ng yana yutqazib qyo'di.

Ayni paytda “Andijon” oliy ligada eng kam gol urgan jamoa bo'lib turibdi - 6ta. “So'g'diyona” esa eng ko'p gol o'tkazgan jamoa - 24ta. “Andijon” shu paytgacha o'z uyida beshta o'yin o'tkazib, bir g'alaba va to'rt mag'lubiyat qayd etdi. “So'g'diyona” esa hozirgacha safarda to'rt marta o'ynab hammasida mag'lub bo'ldi. Lekin qizig'i shundaki, “So'g'diyona” safardagi to'rtta bellashuvda “Lokomotiv”, “Paxtakor”, “Bunyodkor” va “Dinamo” kabi 7ta gol urishga muvaffaq bo'ldi.

X.Xoliqov.