Ali Al Habsi - Ummon terma jamoasining asosiy yulduzi

O'zbekiston terma jamoasi 2019 yil 9 yanvar kuni Osiyo Kubogidagi ilk uchrashuvini aynan shu jamoaga qarshi o'tkazadi. Ummon terma jamoasi bugungi kunda o'ziga yarasha kuchga ega. Bu jamoa Ko'rfaz Kubogi musobaqasining amaldagi g'olibi hisoblanadi. 

Terma jamoaning eng taniqli futbolchisi bu - darvozabon Ali Al Habsi. U Angliya premer-ligasida o'ynagan dastlabki ummonlik bo'ldi. To'g'risini aytish kerak, 30 dekabr kuni 37 yoshni qarshi oladigan darvozabon Osiyoda eng kuchli darvozabonlardan biri hisoblanadi hamda unga gol urish oson emas. 

Ali Al Habsi hozirda Saudiya Arabistonining "Al Hilol" klubi darvozasini qo'riqlab kelyapti. U bungacha o'z mamlakatining "Al Mudhaibi", "Al Nasr", Norvegiyaning "Lin Oslo" hamda Angliyaning "Bolton", "Uigan", "Brayton" va "Reding" klublari darvozasini qo'riqlagan. 

Al Habsi terma jamoadagi debyutini 2002 yil Ko'rfaz Kubogida Bahraynga qarshi nishonlagan. U 2004 yilgi Osiyo Kubogida ham ishtirok etgan. Bu darvozabon mana 14 yildirki o'z terma jamoasi safida yuqori saviyada o'ynab kelyapti. O'zining bir qator seyvlari orqali Ummon terma jamoasini ikki bor (2004 va 2007) Ko'rfaz Kubogi finaliga olib chiqqan mahoratli posbon uchinchi urinishda (2009 yil) bosh sovrinni qo'lga kiritdi. 

Ali Al Habsi shu paytgacha terma jamoa libosida 130tadan ko'p o'yin o'tkazgan. Bu borada u Ummon terma jamoasida eng ko'p o'yin o'tkazgan futbolchilar orasida uchinchi o'rinni egallab turibdi. Birinchi va ikkinchi o'rinlar Ahmad Muborak bilan Favzi Bashirga tegishli. Tajribali darvozabon penaltilarni qaytarishda ham ustasi farang. Unga to'pni havolatib gol urish qiyin. Bo'yi uzun bo'lgani uchun ko'p zarbalarni osonlik bilan hal etadi.

Ummon bilan bo'ladigan bahsda bizning futbolchilar nihoyatda sovuqqon bo'lishlari kerak. Albatta, har bir darvozabonda bo'lgani kabi Ali Al Habsida ham kamchiliklar bor. Muhimi bizning hujumchilar o'sha kamchilikni izlab topishi va uning xatosidan unumli foydalanishda.