Aleksandr Ejov: "Bir ochko qo'lga kiritdikmi yoki yo'qotdik? Buni mavsum oxirida bilib olamiz"

"Hamma guvoh bo'ldi, uchrashuv qiziqarli ruhda o'tdi. Ikkinchi bo'limga kelib hujumga o'tdik, vaziyatlar yuzaga keltirdik. Gol urishimiz mumkin edi. Uchinchi o'yindirki hujumda ishlarimiz yurishayotgani yo'q. Boz ustiga tarkibda rotatciyalar qilishga majbur bo'lyapmiz. Pro liga darajasi o'sayotgani uchun hech bir bahs oson o'tayotgani yo'q. Muxlislar bilan to'lgan stadionda o'ynash baribir boshaqacha zavq beradi. Buning uchun "Yangier" jamoasi muxlislariga rahmat aytaman. Ajoyib muhit hosil qilishdi. O'yin hammaga yoqdi, deb o'ylayman.

Bir ochko yaxshimi yoki yomonmmi mavsum yakunida bilib olamiz. Hozir ochkolarni hisoblab bo'lmaydi. 

Ha, qizil kartochkalar olish bo'yicha birinchi o'rindamiz. Lekin bu jamoada tartib yo'q, degani emas. Futbolchilarning aksariyati Superliga darajasida. Masalan Ro'zimboy Ahmedovda ishtiyoq va xohish yuqori. Hissiyot gohida ko'p narsadan ustun kelib qoladi. Bu borada ishlaymiz. Jamoada tartib va intizom kuchli. Aytganimdek yigitlarda oldinga intilish uchun xohish katta. 

Bunday qiyin o'yinlardan so'ng futbolchilarga dam beramiz. Suniy maydonda o'ynayapmiz. Sarvar Jumaniyozov jarrohlik amaliyotidan so'ng tiklangandi. Yana jarohat oldi. Balki ko'proq dam olish imkoniyatini berarmiz",- deydi Aleksandr Ejov.