Al Helayfi: "Mbappe biz bilan yangi shartnoma imzolashni istamasa, unga eshiklar ochiq"

PSJ klubi prezidenti Nosir Al Helayfi Kilian Mbappening vaziyati haqida gapirdi. Rahbar o'zining eng yaxshi futbolchisi bepul ketishga urinayotganidan taajjubga tushganini aytdi.

"Mbappe klubdan tekinga ketmoqchi ekanini bilganimizda shokka tushdik. Kilian ajoyib yigit. Biroq, bunday ish qilish uning darajasi emas. Biz bundan juda xayron qoldik. Kilian qolishini juda istaymiz. Biroq, uni tekinga qo'yib yubormaymiz. Bu aniq va ravshan narsa. Biz o'zaro og'zaki kelishib qo'ygandik. Aynan shuning uchun men xayron qoldim. Futbolda eng zo'r o'yinching hech qachon tekinga ketmaydi. Mbappe uzog'i bilan ikki haftada qaror qabul qiladi.

Agar, Kilian yangi shartnoma imzolashni istamasa, unga eshiklar ochiq. Hech kim klubdan kattaroq bo'la olmaydi, xatto men ham", -deydi Nosir Al Helayfi.

Malumot uchun, Kilian Mbappening PSJ bilan amaldagi shartnomasi 2024 yilning yoziga qadar davom etadi.