Ahmed Agamuradov: "Xalqaro musobaqalarda neytral hakamlar ishlagani maqsadga muvofiq"

Turkmaniston yoshlar terma jamoasi bosh murabbiyi Ahmed Agamurodov O'zbekistonning turli klublarida faoliyat olib borgan, ayni paytda "Buxoro"da ishlayotgan Tachmurad Agamurodovning o'g'li hisoblanadi.

"Musobaqa tashkilotchilariga minnatdorchilik bildiraman. Toshkentda, O'zbekistonda do'stlarim juda ham ko'p. Bugungi o'yin natijasi biz uchun albatta qoniqarsiz bo'ldi. O'zbekiston bizdan kuchli ekanligi maydonda ko'rindi. Birinchi bo'limda raqibga munosib qarshilik ko'rsatdik.

Bizning jamoamiz keyingi Olimpiada o'yinlari saralashida ishtirok etish uchun tuzilgan. O'sha vaqtga qadar bu yoshlarni shakllantirib boramiz.

Bunday xalqaro musobaqada neytral hakamlar ishlashsa maqsadga muvofiq bo'lardi. Albatta bu birinchi musobaqa bo'lgani uchun balki o'yinlarni o'zbekistonlik hakamlar ishlayotgandir.

Bugungi mag'lubiyat bizni finaldan deyarli chetda qoldiradi. Agar durang o'ynaganimizda ham imkoniyat bo'lardi. Endigi maqsadimiz Tojikistonni mag'lub etish va hech bo'lmasa 3-o'rin uchun bahsda maydonga tushish.

Bu jamoadan 5-6 nafar futbolchi Turkmaniston yuqori divizioni klublarida asosiy tarkibda muntazam o'ynashadi. O'yinchilarimizning ko'pchiligi 1999 yilda tug'ilgan.

O'zbekistonning turli terma jamoalari xorij davlatlariga borib yig'inlar, o'rtoqlik uchrashuvlari o'tkazib qaytishmoqda. Bizda esa hozircha bunday imkoniyat yo'q. SHu bois Toshkentdagi bu musobaqa jamoamiz uchun ayni muddao bo'lmoqda, - deydi Agamuradov.


Narzulla Saydullaev