Sergey Chigodaev: "CAFA turnirida barcha futbolchilarga imkoniyat berishga harakat qilamiz"

Bugun mazkur turnir oldidan matbuot anjumani bo'lib o'tdi. Unda O'zbekiston U-16 terma jamoasi bosh murabbiyi Sergey Chigodaev ishtirok etdi. 

"Musobaqada qatgnashadigan terma jamoalarni bu erda ko'rib turganimizdan xursandmiz. CAFA turniri Osiyo Kubogiga tayyorgarlik jarayonida muhim ahamiyat kasb etadi. Bu nafaqat biz balki qolgan jamoalar uchun ham foydali musobaqa bo'lishi tabiiy. Oldinda bizni qiziqarli va murosasiz o'yinlar kutmoqda. Hamma jamoalarga omad tilab qolaman",- deydi Sergey Chigodaev.

- Bu yoshda futbolchilar turlicha holatda bo'lishlari aniq. Ularning ayni paytdagi sport formasi qanday?

- Bizda boshqa jamoalarga nisbatan tayyorgarlik uchun vaqt ko'proq bo'ldi. Bundan unumli foydalandik. Musobaqaga jismonan, ruhan, taktik tomonlama munosib hozirlik ko'rdik deya olaman. Shuningdek bolalarda bu yoshda ruhiyat muhim omil hisoblanadi. Biz buni ham inobatga olgan holda ishladik. 

- Bir xaftada 3 ta o'yin o'tkaziladi. Bu yoshdagi futbolchilar uchun taqvim og'irlik qilmaydimi?

- Birinchi o'yinimizni o'tkazganimizdan so'ng navbatdagi uchrashuvga tayyorlanish uchun 3 kun vaqtimiz bo'ladi. Bizda tiklanish borasida muammo yo'q, barcha sharoitlar yaratilgan. 

- Bunday o'rtoqlik turnirlarida rotaciyalar orqali qolgan futbolchilarni ham ko'rib olish mumkin. Sizning jamoangizda bu boradagi imkoniyatlar qanday?

- Turnirga 20 nafar futbolchi qaydnomadan o'tkazildi. Shunday ekan hammaga imkoniyat berishga harakat qilamiz. Bunday uchrashuvlar orqali ularda xalqaro o'yin tajribasi shakllanadi. 

- CAFA tasnifidagi musobaqalar Tojikistonda suniy maydonda bo'lib o'tardi. Joriy turnirda futbolchilar Toshkentda tabiiy qoplamali maydonda to'p tepadi. Bu chiroyli o'yin va futbolchilarning o'zini ko'rsatishiga qulay imkoniyatmi?

- Albatta. Tabiiy maydonda jarohat olish ehtimoli kamayadi. Futbolchilar erkin va bemalol to'p tepadi. Buning foydali tomonlari ko'p.