Abbos Fayzullaev: "Superligada muxlislar yutmoqda. Modrich va Koutinoning o'yinlarini kuzataman"

O'tgan mavsum asosiy jamoada debyut qilgan Abbos Fayzullaev bu yilga kelib bir nechta o'yinlar xususan yurtimizda o'tgan U-23 Osiyo kubogi bahslarida muxlislar etiboriga tushdi. "Paxtakor" tarkibida oxirgi ikki uchrashuvda 2ta gol urgan 18 yoshli yarim himoyachiga bir nechta savollar bilan yuzlandik. 

- Abbos "Metallurg" bilan o'yin jamoangizning g'alabasi bilan yakunlandi. So'nggi ikki o'yindan olingan taassurotlar o'rtasida qanday farq bo'ldi?

- To'g'ri Bekobodda g'alaba qozondik. Ikki uchrashuv men uchun yomon o'tmadi. Raqiblar darvozasiga gol urishga muvaffaq bo'ldim. Bilasizmi, "Paxtakor" libosida maydonga tushar ekanman faqat jamoaga yordam berish haqida o'ylayman. Bundan xursand bo'laman.  

- Ayni paytda turnir jadvalida ajoyib intriga yuzaga kelganini ko'rishimiz mumkin. Nima deb o'ylaysiz jamoalar darajasi tenglashganmi?

- Tan olish kerak chempionatimiz ancha qiziqarli o'tmoqda. Bundan faqat o'zbek futboli va muxlislar yutmoqda. CHempionlik uchun kurashadigan bitta jamoa yo'q. Bir nechta klublar bu yo'lda raqobatlashmoqda. Raqobat esa Superliga yanada jozibali kechishini taminlamoqda. 

- Tengqurlaringiz orasida o'zini ko'rsatgan futbolchilardan kimlarni ko'rsatgan bo'lardingiz...

- "Bunyodkor"dagi Umarali Rahmonaliev va "Olimpik"da to'p tepayotgan Po'latxo'ja Xoldorxonovni alohida aytgan bo'lar edim. Bu mavsum ular ancha o'sishga erishishdi. Bundan keyin ham to'xtab qolmay ajoyib o'yinlarini ko'rsatishda davom etishadi, deb o'ylayman. 

- Futboldagi kumiringiz kim? 

- O'zim Felippe Koutino va Luka Modrichning o'yinlarini kuzatib boraman. Kerakli jihatlarini olishga harakat qilaman.

- U-23 Osiyo kubogida Jasur Jaloliddinovning o'rniga zaxiradan tushdingiz. Umuman o'zingiz uchun qaysi poziciyada to'p tepish qulay?

- Hujumchi ortida o'ynashni yaxshi ko'raman. Ikki qanotda vinger sifatida ham harakat qila olaman. Yuqorida aytganimdek asosiysi jamoaga samara keltirishim.

Abdulaziz Iskandarov suhbatlashdi