Хосе Венансио Лопес: "Ўртоқлик учрашувларидаги натижалар аҳамиятсиз. Жорий йиғинда янги футзалчиларни синовдан ўтказамиз"

- Бугунги учрашув ҳақидаги фикрларингиз билан бўлишсангиз?

- Бугунги учрашув бироз тартибсиз бўлди. Икки ойлик танаффусдан сўнг яна паркетга қайтдик. Бир ҳафтадан буён машғулот олиб бораяпмиз. Ўртоқлик учрашувларидаги натижа мен учун муҳим эмас. Муҳими, ўйин сифатини яхшилаш ва жамоа ўсишда давом этиши. Ғалаба қозониш ёқимли, аммо биз янги футболчиларни синаб олишимиз керак. Эртанги учрашувдан сўнг уч нафар футболчи терма жамоага ихтиёрини тарк этади.

- Футзал терма жамоамиздаги асосий фигуралар ушбу йиғинга жалб этилмади. Бунга сабаб нима?

- Ушбу йиғиндаги асосий мақсадимиз янги футболчиларга имконият бериш ва уларни синаб кўриш. Эртанги баҳсда ҳам тўртта янги футболчини паркетда кўрамиз. Йиғин давомида терма жамоага номзод бўлган барча футзалчиларни синаб олишимиз керак.

- Гватемала терма жамоаси мунтазам равишда Жаҳон чемпионатларида иштирок этишига қарамай, гранд жамоалар қаторига кирмайди. Гватемала каби ўртамиёна терма жамоаларга қарши яқинлашиб келаётган мундиалда тўқнаш келишимиз аниқ. Жаҳон биринчилигида бундай жамоаларни мағлуб этишимиз шарт. Сиз ўтган йили ўзингиз Гватемалага бориб семинар ўтказиб келган эдингиз. Икки ойдан сўнг ўтказиладиган Жаҳон кубогида Гватемала футзал терма жамоаси каби ўртамиёна жамоаларга қарши ўйнаш қанчалик қийин бўлади? Бугун ҳам осон ғалабага эришмадик.

- Ҳозир натижа аҳамиятсиз. Шу сабабли кучли терма жамоаларга қарши ўйнамаяпмиз. Футзалчиларимиз ҳали юз фоизликсалоҳиятларини ишлата олишмаяпти. Бунга бироз вақт керак.