"У асабимга тегяпти!" Руни МЮнинг соч олдирмаётган машҳур мухлисини танқид қилди

Гап шундаки, Фрэнк Илетт исмли мухлис МЮ кетма-кет 5 та ўйинда ғалаба қозонмагунча соч олдирмасликка ваъда берган.

Вазият қандай? Кеча Майкл Кэррик шогирдлари АПЛнинг 26-турида "Вест Хэм" билан дуранг ўйнашди (1:1). Шу тариқа, жамоанинг 4 та ўйиндан иборат ғалабали серияси тўхтади, мухлиснинг "челленж"и эса яна бошидан бошланди.

Руни нима деди? Уэйн Руни "No Tippy, No Tappy" подкастида ушбу мухлис ҳақида гапириб, унинг хатти-ҳаракатларидан чарчаганини яширмади:

"У менинг асабимга тегяпти. Биз Майкл Кэррик ва "Ман Юнайтед"нинг бешинчи ғалабаси ҳақида гапиришимиз керак бўлган пайтда, ҳамма эътибор шу йигитнинг соч олдиришига қаратиляпти.

Қизиғи шундаки, агар "Юнайтед" ғалаба қозонса, у роса хафа бўлади деб ўйлайман. Чунки унда соч қолмайди ва у ҳеч кимга қизиқ бўлмай қолади. Мен уни мамлакатнинг нариги чеккасига жўнатиб юборган бўлардим", — деди Руни.

Эслатиб ўтамиз, "Манчестер Юнайтед" Кэррик қўл остида ўз ўйинини топиб олди, бироқ 5 талик зафарли серия манкунианликларга ҳозирча армон бўлиб қолмоқда.