Тимур Кападзе: "Бу кетишда дуранглар бўйича рекорд қўямиз"

Ўйин ҳақида 

- Биз бу кетишда дуранглар бўйича рекорд қўямиз. "Нефтчи" яхши жамоа. Тартибли ҳаракат қилади, ўзининг услуби бор. Бунақа 5 талик ҳимояни ёриб ўтиш осонмас. Йигитлар яхши ҳаракат қилишди, рақибга деярли имкон беришмади. Тезкор гол ўтказиб юбордик, сабабини ўрганиб чиқамиз. Ўйин ҳақида умумий хулосам, бугун яна битта гол урганимизда ғалаба қозонишимиз ҳам мумкин эди. Хурсанд қиладиган томони ўйинни назорат қила олдик. Аниқлик бўйича ишлашда давом этамиз.

- Аниқлик бўйича муаммо кейинчалик тажриба билан келиши мумкинми?

- Ҳа, албатта, кўрганингиздек, вазиятлар ёмонмас. Қаердадир тажриба етишмаяпти. Ҳаммаси вақти билан келади. Зич ҳимояга қарши тезроқ ўйнаш керак, шу бўйича қаердадир хато қилаяпмиз. Фикримча, бугунги ўйинда кўп вазият яратдик. Ишлаймиз, қолганлари индивидуал холат.

- Жамоа футболчиларида кайфият борасидаги муаммо бордек туюлди. Клубда молиявий холат қандай?

- Бу нарса бор, қанақа таъсирини бераяпти, билмайман. Тушунтираяпман, бу ёшдаги йигитлар пул учун эмас, майдонда иштиёқ билан ҳаракат қилиши керак. Машғулотларда ишлаб ўзини кўрсатиши лозим. Биз янада кучли бўлишимиз керак, шунда пул ўзи келади. Йигитлар майдонда яхши ҳаракат қилишаяпти. Иккинчи рақамли бўлиб ўйнайдиган жамоага қарши ўйнаш осон эмас. Биз ҳар бир ўйинда шу каби холатга дуч келаяпмиз. Албатта, оғир учрашувлар бизнинг ўсишимизга сабаб бўлади. 

- Сизда асосий дарвозабон деган тушунча йўқ экан. Ўйинларга қайси сабаблар билан дарвозабонлар танланаяпти?

- Мен учун барча футболчилар бир хил. Ҳаммасига имкон бераяпмиз. Бугун ўйнамаганларни эртаси кунги ёшлар лигасида тушираяпмиз. Владимир ҳам, Шукрон ҳам яхши савиядаги дарвозабонлар. Иккисининг ҳам ўзига хос кучли томонлари бор. Мен барча футболчиларни ўсишлари учун жамоага олиб келганман.