Quyida Yaypanning "Turon" klubi tajribali yarim himoyachisi Sunnatillo Ermatov bilan o'tkazilgan intervyuning to'liq matni bilan tanishishingiz mumkin.
- Sunnatillo, futbolga kirib kelishingiz qanday bo'lgan?
- Futbolga bolaligimdan qiziqardim, o'shandayoq kelajakda futbolchi bo'lishni orzu qilardim. 7 yoshligimda onam Otabek G'ulomxo'jaev boshchiligidagi futbol maktabiga olib borgandilar. Shundan beri futbol bilan shug'ullanib kelayapman.
- Bugunga qadar qaysi jamoalar safida o'ynagansiz?
- Hozirga qadar "Metallurg", "Obod", "Neftchi", “Andijon”, "Cementchi" jamoalarida o'ynadim. Ayni damda "Turon"daman. Bu yerda futbolchilarga yaratilgan sharoitlar a'lo darajada, mavsum yakunida Superliga yo'llanmasini qo'lga kiritishimizga umid qilaman.
- "Turon" klubiga kelib qo'shilishingiz qanday yuz berdi?
- "Turon"ga meni jamoamiz posboni Akmal Ortiqov tavsiya qilgan. Kelib ko'rikdan o'tdim, o'yinlarim murabbiylarga maqul keldi va sharnoma tuzdik. Yuqorida aytganimdek, bu klubda yaratilgan sharoit meni qoniqtirmoqda.
- Bilamiz, siz hujumkor yarim himoyachisiz. Bu ampulada avvaldan o'ynab kelasizmi?
- Futbolga dastlab kirib kelganimdayoq shu poziciyaga moslashganman. Jamoada o'ynaydigan nuqtam o'zimga maqul keladi, boshqa ampulada o'zimni sinab ko'rmaganman.
- Futbolchilik faoliyatingiz davomida qaysi o'yin eng yorqin va esda qolgan uchrashuv bo'lgan?
- Ha, bunday uchrashuv bo'lgan. "Metallurg" safidagi debyut uchrashuvimni yaxshi xotirlayman. Bilasizmi, o'shanda "So'g'diyona"ga qarshi o'ynagandik va men ilk o'yinimdayoq gol urishga muvaffaq bo'lgandim.
- Sizningcha, ayni damda PRO-Liganing eng kuchli futbolchisi kim?
- Shaxsiy fikrimcha, PRO-Ligada ishtirok etayotgan futbolchilar orasida "Neftchi"ning tajribali yarim himoyachisi Mansur Saidov eng kuchlisi deb o'ylayman. Unga qarshi o'ynash har doim oson bo'lmagan, bundan tashqari futbolda ulkan tajribasi bor.
- Xuddi shu savolni O'zbekistonda deb so'rasakchi?
- Shubhasiz terma jamoamiz sardori Odil Ahmedov hozirgi kunda eng kuchlisi.
- Futbolda yaqin do'stlaringiz bormi? Qaysi futbolchilar bilan yaqin do'stsiz?
- Futbolda do'stlarim ko'p, qaysi jamoada o'ynasam futbolchilar bilan tez chiqishib ketaman. "Turon"da ham barcha futbolchilar bilan munosabatimiz a'lo darajada.
- Qaysi xorij klublariga muxlislik qilasiz?
- Kataloniyaning "Barselona" klubi muxlisiman va o'yinlarini muntazam kuzatib boraman.
- Kelajakdagi maqsadlaringiz va muxlislarga tilaklaringiz...
- Yaqin kelajakdagi maqsadim "Turon" bilan Superligiga yo'llanmasiga ega chiqish. Hozirgi kunda jamoamizning bor e'tibori ana shu maqsadga qaratilgan.
Jamoamiz muxlislariga har doim bizni qo'llab-quvvatlashdan charchamasliklarini tilayman, biz hamisha ular uchun maydonga chiqamiz. Nasib bo'lsa mavsum yakunida Superliga yo'llanmasini birgalikda nishonlaymiz.
Bekzod Tolibov suhbatlashdi.
