Сергеев Ширшов ҳамда Алиқуловга етиб олди, Шомуродов эса Бикмаев билан тенглашди

Учрашувни асосий таркибда бошлаган Элдор Шомуродов миллий термадаги 58-ўйинида майдонга тушди ва бу борада Марат Бикмаевга етиб олди. Шомуродов ҳисобида 31 та гол борлигини эслатиб ўтиш жоиз.

Элдорнинг ўрнига захирадан баҳсга қўшилган Игорь Сергеев эса миллий жамоа сафида 63-ўйинида қатнашди. 29 ёшли ҳужумчи ҳисобида эса 17 та гол бор. У терма гвардиячилари рўйхатида Асрор Алиқулов, Николай Ширшов (63 тадан ўйин)га етиб олди. Улардан олдинда эса Андрей Фёдоров (64 та) бор.

Ўзбекистон МТЖ таркибида энг кўп ўйин ўтказган футболчи эса Сервер Жепаров (25 гол) ҳисобланади – 128 та. Ундан кейинги ўринлардан Тимур Кападзе (118 та, 10 гол) ҳамда Одил Аҳмедов (107 та, 21 гол) жой олган.

Эслатиб ўтамиз, Сречко Катанец шогирдлари 27 сентябрда Сувондаги Жаҳон кубоги стадионида Коста-Рикага қарши баҳс олиб боради.