Олим Шокиров: “Режа бўйича Озарбайжон ва Хорватияда ўртоқлик учрашувлари ўтказишимиз керак. Аммо...”

Терма жамоа бош мураббийи Олим Шокиров Ўзбекистон Футбол Ассоцияцияси расмий сайтига бўлажак режалар, мақсадлар ҳақида қисқача интервью берди.

“Жамоа билан 15 март куни йиғилган бўлсак, 16 мартдан давлатимиз томонидан карантин эълон қилинди. Икки ярим ой давомида боллар уйда машғулотларни олиб боришди. Энди карантиндан кейин ҳаммасини бошидан бошламоқдамиз. Аввалги режаларимиз бузилганидан сўнг янги режалар тузишга мажбур бўлдик. Режамиз бўйича Озарбайжонда ва август ойида Хорватияда ўртоқлик учрашувлари ўтказишимиз керак. Аммо, буларнинг барчаси сўроқ остида турибди. Чунки, ҳали авиақатновлар қачон тикланиши номаълум. Шунингдек, биз борадиган мамлакатда вазият қандай эканлигини ҳам билишимиз керак. Шуниси аниқки, режаларимизда халқаро ўйинларда иштирок этиш белгиланган. Қолганини вақт ва шароит кўрсатади.

Машғулотларда урғуни кўпроқ тўп билан ишлаш ва ўйинни ўз назоратимизга олиш устида ишлаймиз. Расмий учрашувларда ҳам ҳужумкор футбол кўрсатишга ҳаракат қиламиз. Олдимизда турган минимал вазифа Осиё чемпионати орқали Жаҳон чемпионатига йўлланмани қўлга киритиш. Мундиалда Европа, Америка қитъаларидан вакиллар қатнашади. Бу шогирдларимиз учун катта тажриба мактаби вазифасини бажаради”,- дейди Олим Шокиров.