"Навбаҳор": Тайёргарликнинг дастлабки босқичи якунланди

Йиғин якунида мураббийлар машғулотларда қатнашаётган футболчилардан икки таркиб ҳосил қилиб, жамоа ёшларига қарши назорат учрашувини ташкил этишди. Ўйин ҳақида тўхталишдан олдин таркибга қўшилган футболчилар ҳақида маълумот бериб ўтсак. Мавсумнинг биринчи ярмини Уйчининг "Хотира-79" жамоасида ўтказган Элмурод Низомбоев яна жамоа машғулотларида иштирок этмоқда. Шунингдек, андижонлик посбон Лочин Долимов ҳам айни пайтда кўрикдан ўтмоқда.

Асосий таркиб вакиллари ёшлар билан бир бўлим давомида куч синашишди. Асосий таркибга киришга даъвогарлик қилаётган футболчилардан ташкил топган таркиб эса икки бўлим давомида ҳаракат қилди. Кошелев бошчилигидаги етакчилар 0:0 ҳисобидаги дуранг билан чекланишди. Таркиб эса қуйидагича кўринишга эга бўлди: Лочин Долимов, Тимур Султанов, Қаҳрамон Маҳаммаджонов, Жаҳонгир Меҳмонов, Ботир Тўрабоев, Илҳом Бойдедаев, Азим Аҳмедов, Леонид Кошелев, Ғайрат Жўраев, Акрам Баҳриддинов, Рўзимбой Аҳмедов. Тўлиқ ўтказилган баҳсда ёшлар 2:1 ҳисобида ғалаба қозонишди.

Ёшларга қарши қуйидаги таркиб ҳаракат қилди: Ислом Жўраев, Бобур Расулов, Фарруҳ Йўлдошев, Мирзоҳид Маҳкамов, Маҳсуд Ҳайитов, Абдулазиз Султанов, Абдураззоқ Жўраев, Аюбхон Гаппаров, Муҳаммад Расулов, Элмурод Низомбоев, Соҳиб Абдуллаев. Ягона жавоб тўпига Соҳиб Абдуллаев муаллифлик қилди.

Ёшларнинг голлари эса Мурод Раҳмонов (пен.), ва Фарҳод Шокировлар ҳисобига ёзилди. Собир Ҳамидов бироз бетоблиги боис ўйинда майдонга тушмаган бўлса Абдумалик Абдуллаев, Аъзам Алиев ва Виктор Мочалов каби футболчилар ёшлар сафида тўп суришди.