"Мураббийнинг ўзгариши ҳаёт тўхтаб қолганини англатмайди". "Металлург" футболчиси Ихтиёр Тошпўлатов илк ғалабадан сўнг яна нималар деди?

"Мавсумдаги биринчи ғалабамизни ўз майдонимизда, мухлисларимиз қаршисида нишонлаганимиздан хурсандмиз. Айтганимдек очилиш учрашуви бўлгани учун ғалаба қозонишдан бошқа чорамиз йўқ эди. Рақибни мағлуб этиб байрамона кайфиятни давом эттиришни ният қилгандик. Ишқибозларимиз олдида ҳам юзимиз ёруғ бўлди. Биринчи турда "Сурхон" билан учрашувда режаларимиз иш бермади. Шу боис иккинчи турда ўз ўйинимизни кўрсатишимиз шарт эди.

Тўғри, стартдаги илк баҳсдан сўнг жамоамизда мураббий ўзгарди. Лекин бу билан ҳаёт тўхтаб қолмайди. Жамоамизни тарк этган Андрей Шипилов учун ҳам ўйнашимиз ва ўзимизни кўрсатишимиз шарт эди, деб ўйлайман. "Бунёдкор" бизга ҳар томонлама қаршилик кўрсатишга уринди. Аммо омад бизга кулиб боқди. 

Шаҳзод Нурматов мажбурий ўзгартирилди. Шундан сўнг мураббийларимиз мендан олдинги чизиққа ўтиб ўйнашимни айтишди. Бунинг сабаби эса мен аввал ҳам ҳужумда тўп тепганман. Бу борада қийинчилик бўлгани йўқ",- дейди футболчи.