Данияр Абдураимов: "Ёш ўйинчиларингиз яқин орада асосий таркибдагиларга рақобат қила олишади"

Учрашувдан кейин "Эрем" бош мураббийи Данияр Абдураимовнинг фикрлари билан қизиқдик.

- Бугун биз охирги 6 кундаги тўртинчи ўйинни ўтказдик. Клублар ўртасидаги Осиё чемпионати олдидан режалаштирилган назорат ўйинларимиз шу билан ниҳоясига етди. 4 ўйиндан фақат биттасида ғалаба қозондик ва учтасида енгилдик. Демак, тўғрилашимиз керак бўлган жиҳатлар бор. Бу биз учун жуда фойдали ўйин бўлди. Ўзбекистон терма жамоасида дўстларимиз Баҳодир (Аҳмедов) ва Нодир (Элибоев) мураббийлик қилишмоқда. Ўйин учун уларга ҳам миннатдорчилик билдираман.

- Клублар ўртасидаги Осиё чемпионатига шу таркиб билан борасизларми?

- Тошкентга келиш олдидан икки нафар асосий ўйинчимизни йўқотдик. Сардоримиз Аделат Қултаев ва Дилшод Қадиров жароҳат олишди. Уларнинг ҳар иккиси миллий терма жамоа аъзоси ҳам ҳисобланишади. Бу якуний таркибимиз. Олдиндаги мусобақа учун таркибимизга узоғи битта ўйинчи келиб қўшилиши мумкин.

- Ўзбекистон терма жамоаси ўйини ҳақида фикрингиз?

- Ўзим 12 йил олдин Ўзбекистонда "Строитель Зарафшон" жамоасида ўйнаганман. Шу сабаб, ўзбек футзали ҳақида яхши биламан. Ўшанда ҳам сизларда футзал яхши даражада эди. Бу йиғинга мураббийингиз ёш ўйинчиларни чақирибди. Икки ўйиндан келиб чиқиб айтишим мумкин-ки, мураббийлар яхши ишламоқда. Бу ёш футзалчилар асосий таркибдагиларга яқин вақтларда рақобат қила олишади. Баҳодир Аҳмедов ва Нодир Элибоев испаниялик Хосе Мария Мендездан кўп нарса ўрганишгани кўриниб турибди.