“Бунёдкор-2002” халқаро турнир ғолиби

12-16 май кунлари пойтахтимизда спорт устаси Станислав Стадник хотирасига бағишланган халқаро мусобақа ўтказилди. Унда жами саккизта жамоа, иккита гуруҳга бўлинган ҳолда иштирок этди. Қайд этиш керакки, мусобақада қўшни Қозоғистондан ташриф буюрган иккита жамоа ҳам қатнашди.

Сергей Чигодаев бошчилигидаги тарбияланувчиларимиз гуруҳ босқичи доирасида “Тапоич”ни 8:0, “Бухоро”ни 4:1 ва Қозоғистоннинг “Зарендинец” жамоасини 3:0 ҳисобида мағлубиятга учратиб, ярим финалга биринчи ўрин билан йўлланма олдилар. Финал йўлланмаси учун “Олмалиқ” клуби билан куч синашилди ва баҳсда ўсмир “қалдирғочлар” 2:1 ҳисобида зафар қучишди.

Ҳал қилувчи финал баҳсида Сергей Чигодаев шогирдлари гуруҳ босқичидаги “эски таниш” рақиб “Бухоро” билан куч синашишиб, йирик 5:0 ҳисобида зафар қучишди ва мусобақа олтин медалларига эга чиқишди. 3-ўрин учун кечган баҳсда “Олмалиқ” футболчилари “Зарафшон”ни 4:3 ҳисобида мағлубиятга учратишди.

Турнир якунига кўра, ташкилотчилар томонидан Диёрбек Раҳимқулов энг яхши футболчи ва Отабек Жўрақўзиев энг яхши тўпурар (10та гол) номинациясида ғолиб деб топилдилар.