Бу қизиқ. "Пахтакор" ўйинига 1 соат 43 дақиқага кеч қолган Алимов

Учрашувни томоша қилиш учун 60 минг ишқибоз ташриф буюрган. Баҳсга ҳамма нарса тайёр эди, фақат ҳакамдан ташқари.

Беллашувга москвалик Сергей Алимов тайинланганди, аммо ноқулай об-ҳаво туфайли у Москва аэропортида бир суткадан кўпроқ ўтирган. Самолётга ўтирар экан, кеч қолганини билган Алимовни бир нарса ўйлантирарди: «Кутишадими ёки йўқми?».

Стадион эса кутарди. "Пахтакор"да ўтирганлардан ҳеч ким тунни ухламасдан ўтказган ҳакамга самолётдаёқ кийимни алмаштириб олиш ҳақида айтилганини билмасди. Алимов самолётнинг ўзида кийимини алмаштириб олади.

«Волга» автомобили ҳакамни самолёт трапидан тўғри стадионга етказиб келади. Ўйин 1 соат 43 дақиқа кечикиб бошланади. Ўшанда "Пахтакор" беллашув якунида Юрий Беляков томонидан киритилган ягона гол эвазига ғалаба қозонган. Ҳакам эса уйқусиз тунга қарамай, ўйинни жуда яхши бошқариб борган.