U-23 футболчилари: "Бизга ҳеч ким 10 минг доллар берасизлар дегани йўқ"

Кеча интернет тармоғида Ўзбекистон U-23 терма жамоасининг Хитойда бўлиб ўтган Осиё чемпионатидаги ютуғидан сўнг чемпионларга муҳтарам Президентимиз Шавкат Миромонович Мирзиёев томонидан совға сифатида тақдим этилган "Malibu" автомобилларини расмийлаштириш учун футболчилардан пул сўралгани ҳақида хабар тарқалди.

Эмишки "Malibu" машинасини ҳар бир футболчи ўз номига расмийлаштириб олиши учун 10 минг АҚШ доллари миқдорида пул бериши керак бўлган. Шундагина ҳамма қоғозли ишлар жой-жойида бўлар экан. Бу хабарни ўқиб бошида ҳайрон қолдик. Ахир бу - Президент совғаси бўлса, футболчилардан пул ундириш тўғримикан деб. Сўнгра вазиятга ойдинлик киритиш мақсадида U-23 терма жамоасининг уч нафар футболчиси билан боғланиб, ушбу масала юзасидан уларнинг фикрини эшитдик. Шуни айтиш лозим, ҳар учала футболчи бундай гап-сўзларни рад этди.

Достон Турсунов (ҳимоячи): - "Бемалол тўғрисини айтишим мумкин, ҳеч кимга менга шунча пул беришинг керак, шундан кейин машинани ўз номингга расмийлаштириб берамиз дегани йўқ. Ҳеч ким менга 10 минг доллар тўлашинг шарт демади. Осиё чемпионатидаги ютуғимиз туфайли муҳтарам Юртбошимиз бизни машина билан тақдирладилар ва у кишига катта раҳмат".

Андрей Сидоров (ҳужумчи): - "Тўғриси, буни биринчи бор сиздан эшитиб турибман. Футболчилардан пул сўрашгани бўлмаган гап. Тўғри, ҳозирча машинани ўз номимга расмийлаштирганим йўқ, лекин бу тез орада ҳал бўлишидан умидворман. Аммо футболчилардан 10 минг доллар сўрашгани умуман бўлмаган гап".

Забихилло Ўринбоев (терма жамоа сардори): - "Кеча шу хабар чиққанидан бери кўпчилик танишларим ростан шунақа бўлдими деб сўрашди. Бошида ўзим ҳам ҳайрон қолдим ва бунақа гап йўқ дедим. Мана энди сиз сўраяпсиз. Фақат шуни айтишим мумкин, мендан ҳам, жамоадаги бошқалардан ҳам ҳеч ким машинани ўз номларингга расмийлаштириб олиш учун пул тўлашинглар керак деб айтгани йўқ.  10 минг доллар бериш керак деган гаплар қуруқ гапдан бошқаси эмас. Менимча, буларнинг барини кимдир тўқиб чиқарган".



Х.Холиқов.