Қаршида Нуриддин Зайниев хотирасига бағишланган ҳужжатли фильмнинг тақдимоти бўлиб ўтди

"Футбол одами" дея номланган мазкур ҳужжатли фильм "Фаввора фильм" томонидан суратга олинган.

Маълум бўлишича ҳужжатли фильмни суратга олиш учун 50 миллион сўмга яқин пул сарфланган.

"Фаввора фильм" студияси муассиси Келдиёр Хўжаёровнинг айтишича, Нуриддин Зайниев ҳақидаги ҳужжатли фильмни суратга олиш ишлари ўтган йили ёз фаслида бошланган.

"Нуриддин Зайниев билан бирга ишлаганмиз. "Фаввора фильм" студиясини очганимиздан сўнг футбол фидойиси ҳақидаги ҳужжатли фильм суратга олиш ғояси туғилди. Суратга олиш жараёнлари ўтган йили ёз фаслида бошланган эди. Бу йил ёз фаслида тайёр бўлди. Бироқ пандемия сабаб фильм намойиши кечикиб келди", - дейди Келдиёр Хўжаёров.

21 дақиқа давом этадиган ҳужжатли фильмда "Насаф" билан ОФК кубогини ютган украиналик мураббий Анатолий Демьяненко ҳам Қашқадарёнинг собиқ ҳокими ҳақида хотираларини айтиб ўтган. Интервью Украинада тасвирга олинган.

"Нуриддин Зайниев "Насаф" ва "Машъал" футбол академиясини ташкил этишда жонбозлик кўрсатганини биламан. Футболга жуда қизиқар эди. Ҳар сафар ўйин олдидан кўришганимизда бугун қандай тактика танлайсиз, қайси таркибни туширасиз" деб сўрарди", - дейди фильмда Демьяненко.

Эслатиб ўтамиз, Нуриддин Зайниев 2002-2011 йиллар оралиғида Қашқадарё вилояти ҳокими бўлиб ишлаган. Нуриддин Зайниевич раҳбарлиги даврида 2011 йили Қаршининг "Насаф" клуби ОФК кубоги соҳибига айланган.