"Нефтчи" Монаховга жавоб бериб юборди

Бундан бироз олдин, жамоа йиғинига Павел Смоляченко ва мураббий сифатида таклиф этилган Абдумажид Тоировнинг қўшилгани хусусида хабар бериб ўтгандик.

Афтидан жамоа бош мураббийи Амет Мемет иккита тенг кучли таркибни шакллантирмоқчи. Нега деганда, клуб селекцияга катта эътибор қаратиб, кун-ора янги футболчиларни синовдан ўтказмоқда. Масалан Павел Смоляченко бугун собиқ жамоасига қайтиб, "Гулистон"га қарши кечган баҳсда майдонга тушди. Ваҳоланки, Смоляченко (фотода) кеча "Динамо" билан бирга эди.

Бундан бир неча кун олдин кўрикдан ўтиш учун ташриф буюрган украиналик ҳимоячи Антон Монахов бугунги ўйинда жамоа таркибида кўриниши бермади. Олинган маълумотларга кўра, бу футболчига мураббийлар штаби жавоб бериб юборган.

"Нефтчи" бугун Қибрайда Динамо билан ҳам назорат учрашувида майдонга тушади. Кеч соат 17:30да бошланиши режалаштирилган ўйинда жамоанинг бошқа футболчилари Ғайрат Ҳасанов, Шавкат Насибуллаев, Иқбол Акрамов, Мансур Саидов, Зайниддин Тожиев каби ўйинчилар синаб кўрилади.

Бугун "Гулистон"га қарши кечган ўйинда  "Нефтчи" рақибининг жиддий қаршилигига дуч келди ва ўйинда 3:3 ҳисобида дуранг қайд этди. Жамоа сафида ҳаракат қилган ўйинчилар билан танишинг.

"Нефтчи": Ҳислат Чилматов, Ғайрат Жумаев, Абдумажид Тоиров, Шукурали Пўлатов, Дилёрбек Эрматов, Вячеслав Пономарёв, Санжар Асқаралиев, Сардор Соибов, Павел Смоляченко, Носир Отақўзиев, Отабек Исроилов.
Захирадан майдонга тушганлар: Фарруҳ Турдиалиев, Иқбол Бобохонов, Иззат Ғаниев, Мирзакамол Камолов, Мўйдин Мамазулумов.
Голлар: П.Смоляченко, М.Камолов, М.Мамазулумов.