Фабио Каннаваро: “Январь ойида маҳаллий футболчилар учун йиғин ўтказамиз, у ерда ёшларга имконият берамиз”

“Ютиш ҳар доим ёқимли бўлади. Мухлислар ҳаммаси хурсанд. Эронга қарши ўйнаш осон эмас — доимий кураш талаб этилади. Улар жуда кучли терма жамоа, шунинг учун бўшашиш мумкин эмасди. Биринчи бўлимда ўйинни назорат қилдик, бир нечта вазиятдан фойдалана олмадик. Иккинчи бўлимда эса гол урмасангиз, ўйин қийинлашиб боришини кўрдик. Аммо яхши вазиятдан чиқиб кетдик, дарвозамиз олдида жиддий хавф туғилмади. Албатта, қизил карточкадан кейин ўйин оғирлашди, лекин мен ўйинчиларимнинг менталитетидан мамнунман. Бир киши кам бўлсак ҳам рақибга имконият қолдирмадик.

Айтиб ўтганимдек, Эрон Осиёдаги энг кучли терма жамоалардан бири, уларда яхши штаб ишлайди. Футболчиларимиз қизил карточкадан кейин бир жамоа бўлиб ўйнашди. Бундай рақибга қарши битта кам ўйнаш осон эмас”, — дейди Фабио Каннаваро.

— Иккита йиғин ўтказдик. Каннаваронинг футболи Миср билан ўйиндами ёки бугунги финалдами?

— Мен кўп нарсани ўзгартиришни истамайман, лекин айрим жиҳатларни яхшилаш керак. Биз кўпроқ ҳимоядан чиқишга ҳаракат қилдик. Тўп билан ва тўпсиз ҳолатда баланcни ушлашга интилдик. Юқори прессинг қилдик — булар одатий нарсалар. Вақтимиз кўп эмас, шунинг учун ҳамма нарса бирданига ўзгармайди. Лекин мен омадлиман, чунки ақлли футболчиларим бор. Улар машғулотлардан завқ олишяпти. Терма жамоадаги ички муҳит яхши. Жисмоний томонлама яхшиланишимиз керак. Март ойидаги йиғинда яна кўрамиз. Чемпионатимиз тугайди, Европадаги футболчиларимиз эса ўйнашда давом этади.

— Терма жамоага келганингиздан кейин бир нечта ўзгаришлар қилдингиз. Масалан, нутрицолог жалб этилди. Бу нималарга ёрдам беради?

— Нутрицолог таом сифатига жавоб беради. Тўғри, бу майда деталдек туюлиши мумкин. Лекин айнан майда жиҳатлар катта натижаларга олиб келади. “Нутрицолог келди, шунинг учун ютиб қўйдик”, дея олмайман. Биз пенальтилар серияси бўйича алоҳида ишладик. Қайси футболчи яхшироқ тепишини кўриб, шунга қараб танлов қилдим. Пенальти — баъзан омадли, баъзан омадсиз тугайдиган жараён.

Остонда юқори потенциал бор. Бироқ 45 дақиқадан кейин муаммолар пайдо бўлмоқда. Мен битта ўйинни юқори савияда ўйнаб, иккинчисида пасайиш бўлишини истамайман. Ҳар доим барқарорлик керак. Бу унинг ўзи учун ҳам фойдали бўлади. Умид қиламанки, Остонга ёрдам берамиз ва барқарор ўйин кута оламиз.

— Жалолиддин Машариповнинг ҳолати ҳақида...

— Жалолиддин Машарипов билан гаплашдим. У югуришни бошлади. Бу турнирга келишга деярли тайёр эди. Умид қиламанки, март ойидаги йиғинимизда қатнашади. Йиғин бошида 9 нафар, кейин 3 нафар футболчи йўқ эди — бу терма жамоаларда учраб турaдиган ҳолат.

— ФИФА кунларидан ташқари, масалан январь ойида ҳам йиғин ўтказиладими?

— Биз январь ойида йиғин ўтказиш ҳақида аллақачон гаплашганмиз. У ерда фақат маҳаллий футболчилар бўлади. Таркибимизнинг катта қисми легионерлардан иборат, лекин бошқа номларни ҳам синаб кўрамиз. Ёшларга имконият берамиз. Бизга барча футболчилар керак.