«Ардус» Европа чемпионига қарши 2та ўртоқлик учрашуви ўтказади

Европанинг энг кучли клубларидан бири ҳисобланган «Қайрат» 17 август куни Тошкентга ташриф буюради. Ушбу икки жамоа ўртасидаги ўртоқлик учрашувлари 18 ва 19 август кунлари Тошкентдаги «Ўзбекистон» спорт мажмуасида бўлиб ўтади. Ҳар иккала ўйин ҳам 17:30да бошланади.

Қайд этиш жоиз, 1995 йилда асос солинган «Қайрат» сўнгги йилларда мунтазам УЕФА Кубогининг финал тўртлигидан жой олиб келмоқда. 2013 йили «Қайрат» ушбу мусобақа финалида Москванинг «Динамо» жамоасни мағлубиятга учратиб (4:3), Кўҳна қитъанинг энг кучли клуби деб топилди.

«Қайрат»га қарши ўйинлар «Ардус»га 27 август – 1 сентябрь кунлари Япониянинг Нагоя шаҳрида бўлиб ўтадиган клублар ўртасидаги 2013 йилги Осиё чемпионати ўйинларига тайёргарлик кўриш имконини беради. Япониядаги мусобақа гуруҳ босқичида «Ардус» «В» гуруҳида Эроннинг «Санае Гити Пасанд», Таиланднинг «Чонбури Блувейв» ва Қатарнинг «Ас-Садд» жамоаларига қарши тўп суради.

Эслатиб ўтамиз, Осиё футзал клубларининг 2012 йилдаги энг нуфузли мусобақасида «Ардус» финалгача етиб бориб, ҳал қилувчи ўйинда «Санае Гити Пасанд»га 1:2 ҳисобида имкониятни бой берган эди.