Андижонда “Андижон баҳори” мусобақаси бўлиб ўтди

Ушбу санъа ҳар йили мамлакатимизнинг ҳар бир вилоятида, шаҳар ва чекка-чекка қишлоқларида доим кўтаринки руҳда ўтказилиб келинади.

Хусусан жорий йил ҳам Андижон шаҳрида 8-март кунига бағишлаб ўқувчи ёшлар ўртасида футбол бўйича “Андижон баҳори” мусобақаси бўлиб ўтди. Унда олий ўқув юрти, ўрта махсус касб-хунар коллежи ва мактабда таълим олаётган ўқувчи ёшлардан иборат жамоалар бевосита иштирок этиб, ўзларини кўрсатишга уринди.

5 март куни старт олган мазкур мусобақада жами 10та аёллар жамоаси қатнашиб, ғолиблик учун кураш олиб борди. Ушбу “Андижон баҳори” турнирини ўтказишдан асосий мақсад – вилоятда аёллар футболини янада ривожлантириш, футболга қизиқиши бўлган қизларга ўзларини кўрсатиш учун кенг имконият яратиб бериш, вилоятдаги ўқув муассасалардаги талабалар ўртасидаги дўстлик ришталарини боғлаш ҳамда “Андижанка” жамоасига иқтидорли қизларни танлаб олишдан иборат эканлигини айтиш лозим.

Ўйинлар Андижон шаҳрининг Шўрбулоқ даҳасида жойлашган “Футболга ихтисослаштирилган мактаб-интернати”нинг сунъий қопламали майдонида бўлиб ўтди.

Бугун мусобақанинг финал босқич ўйинлари ўтказилиб, ғолиб жамоалар номи маълум бўлди. Унга кўра, олий таълим муассасалари ва касб-хунар коллежи талабалари иштирокидаги гуруҳида 1-ўринни Андижон давлат университети жамоаси, 2-ўринни – Қишлоқ хўжалик институти жамоаси, 3-ўринни эса Андижон машинасозлик институти жамоаси эгаллади.

Мактаб ўқувчилари ўртасида эса 1-ўринни – Хўжаобод тумани жамоаси, 2-ўринни – Улуғнор тумани жамоаси, 3-ўринни Жалолқудуқ тумани жамоаси эгаллади.

Мусобақанинг тақдирлаш маросими кўтаринки руҳда ўтказилиб, совриндор жамоалар Андижон вилоят  ҳокимлиги, Андижон вилоят футбол ассоциацияси, Болалар спортини ривожлантириш жамғармаси, Ёшлик ЖТСЖ ҳамда Вилоят жисмоний тарбия ва спорт бошқармаси томонидан қимматбаҳо совғалар ва дипломлар билан тақдирланди.