Футзал. Хосе Мария Мендез ва Артур Юнусов иштирокида матбуот анжумани ўтказилди

Футзал бўйича Ўзбекистон терма жамоаси бош мураббици Хосе Мария Мендез ҳамда жамоа сардори Артур Юнусов Ўзбекистоннинг жаҳон чемпионатлари финал босқичи тарихидаги илк ўйини олдидан ўз фикрлари билан ўртоқлашди.

Артур Юнусов: “Биз учун бу Жаҳон чемпионатларидаги дебют бўлади. Аммо бу – биз бу ерга сайёҳ бўлиб келдик, дегани эмас. Ниятимиз – ўзимизнинг энг яхши ўйинимизни намойиш қилиб, мухлислар меҳрини қозонишдир. Бизнинг биринчи навбатдаги вазифамиз – гуруҳдан чиқиш ҳисобланади. Бу мақсадга эришиш учун бизга боғлиқ бўлган барча ишни амалга оширамиз. Жамоамиз мусобақага тайёр, деб ўйлайман. Сўнгги вақтларда Осиё футзали анча ўсишга эришди. Биз буни амалда исбот қилишни истардик”.

Хосе Мария Мендез: “Футзал бўйича энг йирик турнирда иштирок этаётганимиздан хурсандмиз. Умид қиламанки, Колумбияда имкон қадар узоқроқ ушланиб қоламиз. Ўзбекистонда футзал жадаллик билан ривожланяпти. Бизнинг Колумбиядаги муваффақиятли иштирокимиз эса ушбу спорт турининг кейинги ривожи йўлида муҳим туртки бўлиши мумкин. Гуруҳимиз анчагина мураккаб. Бизни кўпчилик аутсайдер сифатида баҳолаётган бўлиши мумкин. Аммо бу бизга қўл келиши эҳитимоли ҳам бор. Жамоам турнир сюрпризига айланишини чин дилдан умид қиламан”

 “Панама терма жамоаси ҳақида фақатгина ижобий сўзларни айта оламан. Бу жамоада асосий эътиборни жисмоний жиҳатга қаратган кучли футзалчилар тўпланган. Бундай жамоаларга қарши ўйнаш доим қийин. Биз учун энг муҳим ўйин айнан Панамага қарши кечадиган илк баҳс бўлади. Шунинг учун биз фақат ғалаба қозонишга интиламиз”

Эслатиб ўтамиз, Ўзбекистон – Панама учрашуви Тошкент вақти билан 11 сентябрь, 04:00да старт олади.