"Хоразм" Нурметовни ўрнига Алимовни таклиф этди

Александр Ежов бошқарувидаги Урганчнинг "Хоразм" жамоаси пойтахтимиздаги "Геофизика" қароргоҳида кунига икки маҳалдан машғулот ўтказмоқда. Жамоа кеча Термизнинг "Сурхон" жамоасига қарши назорат учрашуви ўтказиб, 2:2 ҳисобида дуранг қайд этди. Шуни ҳам алоҳида таъкидлаб ўтиш лозимки, урганчликлар икки бор ҳисобда олдинга чиқиб олишганди. Аммо якунда томонлар дурангга имзо чекди. 

Шу куни "Хоразм" таркибида бир қатор янги футболчилар харакат қилганини кўриш мумкин эди. Хусусан "Норин" жамоасидан таклиф этилган марказий ярим ҳимоячи Акбар Муродов, "Пахтакор" ёшлар жамоаси билан хайрлашган 20 ёшли маҳаллий футболчи Рафик Каримов ҳамда Нукуснинг "Орол" жамоасидан ҳужумчи Наврўз Алимов эндиликда мавсумнинг иккинчи қисмини "Хоразм"да ўтказадиган бўлди.  

Хабарингиз бўлса керак, бунгача урганчликлар шарафини ҳимоя қилиб келган тўпурар ҳужумчи Қадамбой Нурметов ёзги трансфер чоғида  "Андижон" жамоасига кўчиб ўтгач, "Хоразм" устози олдинги чизиқни кучайтириш мақсадида Алимовни таклиф этди.