Вадим Абрамов: "Ал Ҳилол"ни ютиш учун келгандик"

Учрашувдан сўнг "темирйўлчилар" устози Вадим Абрамов ўз фикрларини билдирди.

- Ўйин ҳақида нима дея оламан? Фақат шуни айтишим мумкин, бугунги мағлубиятни тезроқ унутган ҳолда кейинги баҳсга тайёрланишимиз керак. Бу ерга ғалаба қозониш мақсадида келгандик, бироқ "Ал Ҳилол" бунга имкон бермади, - дейди Абрамов. 

- Ҳисоб 2:1 бўлгач, "Локомотив" футболчилари ортиқ ҳаракат қилмай қўйишди. Бу нима билан боғлиқ?
- Бу ҳақда бирор гап айтишим мушкул. Футболчиларнинг охиригача ҳаракат қилмагани мени ҳам ҳайрон қолдирди. Албатта, ўйин видеоёзувини кўргач, ҳаммасини таҳлил қилиб чиқамиз ва хатоларни ўрганамиз.

- "Локомотив" таркибида фақат маҳаллий футболчилар тўп тепди. Жамоангизда легионерлар йўқми?
- Нега энди? Бугун майдонга икки нафар легионерни туширдим. Улардан бири ҳимояда, иккинчиси ярим ҳимояда тўп тепди.

- Ўзбекистонда мавсумнинг ҳали бошланмагани ўйинда ўз таъсирини ўтказдими?
- Албатта, бу биринчи учрашувимиз бўлгани учун ўзимиз хоҳлаган футболни намойиш эта олмадик. Кейинги беллашувларда янада кучлироқ тўп тепишга ҳаракат қиламиз.