Уммон U-16 ўсмирлар терма жамоаси Тошкентга ташриф буюрди

Мазкур йиғин давомида Мочинов шогирдлари Уммон U-16 ўсмирлар термасига қарши назорат учрашувларида майдонга тушиши режалаштирилган.

Аввалроқ, Уммон U-16 ўсмирлар терма жамоасининг ташриф режаси ўзгаргани ва июнь ойи сўнгида иккала терма жамоа иштирокида ўтказилиши режалаштирилган ўртоқлик ўйинлари бошқа муддатга қолдирилгани ҳақида хабар берган эдик.

ЎФФ Терма жамоалар маркази берган маълумотга кўра, Уммон U-16 ўсмирлар терма жамоаси 6 июль куни Тошкентга етиб келган ва айни дамда иккала терма жамоа иштирокида бўлиб ўтадиган ўртоқлик учрашувлари бўйича музокаралар бўлиб ўтган. Унга кўра, Ўзбекистон ва Уммон ўсмирлар терма жамоаси 9 ва 11 июль кунлари «ЖАР» стадионида ўзаро иккита ўртоқлик ўйинида майдонга тушадилар. Ҳар иккала учрашув ҳам соат 18:00да бошланиши режалаштирилган.

Маълумот ўрнида, Ўзбекистон U-16 ўсмирлар терма жамоаси 15 июль куни Туркияга халқаро турнирда иштирок этиш учун жўнаб кетиши режалаштирган. Мазкур турнирдаги иштирок ҳақида кейинроқ батафсил маълумот берилади.