U-23 Осиё чемпионатидаги 5 нафар яхши ўйинчимиз
21 янв 2016 16:41
Янгиликлар

U-23 Осиё чемпионатидаги 5 нафар яхши ўйинчимиз

Гуруҳдан ортга қайтишга мажбур бўлган Ўзбекистон олимпия терма жамоасида ҳам ўзини кўрсата олган футболчилар бўлди.

Келинг, фақат ёмонлик ҳақида эмас, келажакда ростан ҳам бизга ас қотиши мумкин бўлган беш нафар футболчиларга тўхталиб ўтамиз.

Афсуски, биз ҳамма футболчиларни ҳам майдонда кўра олмадик.

Акром Комилов ("Бунёдкор")
Диёр Туроповнинг жароҳатидан сўнггина ОТЖ сафига қўшилган Акром Комиловга аслида захира футболчиси сифатида қаралган эди. Лекин 1996 йилда таваллуд топган ҳимоячи ўзини асосий таркиб аъзоси эканлиги ва ундан катта ёшдаги футболчилар, ундан устун эмаслигини кўрсата олди. Бу футболчи шу кетигида биз учун Виталий Денисовнинг издоши бўлиши керак. Денисов учун 2018 йилги уруниш сўнггиси бўлиши мумкин. 2019 йилга келиб Акром 23 ёшда бўлади, айни гуллаган пайтида ҳам ўйини мана шундай кучли бўлишини истаб қоламиз.

Достон Ҳамдамов ("Бунёдкор")
Бу футболчи бежизга Осиёнинг энг яхши ёш футболчиси бўлганлигини исботлай олди. Ярим ҳимоячи сифатида учта ўйинда иккита гол бу яхши натижа. Достон ҳам 1996 йилда таваллуд топган ва унинг ўрнида 1993/94 йилда туғилган бирон футболчи асосий таркибга кира олмагани ўзбек футболининг минуси бўлса, ёш футболчини порлаб чиқаётгани плюсидир. Бу футболчи, келажакда Турсунов ва Ҳасанов учун ажойиб "замена".

Жавоҳир Соҳибов
МТЖда Азиз Ҳайдаровнинг қора меҳнатини кўрмаймиз, "Пахтакор" ва ОТЖда ҳудди шу вазифани Жавоҳир Соҳибов бажаряпти. Бу футболчидан ҳам умидимиз катта, таянчни янада мустаҳкам ушлаши учун жисмоний ҳолатини ошириши керак. Ҳайдаровдан роппа-роса 10 ёш кичик фарғоналик футболчи бугунни ўзида унга рақобатчлик қилаётгани яхши ҳолат.

Тимур Ҳакимов ("Оқ-Тепа)
Бу футболчини бежизга Гейнрихга ўхшатишмайди. Уни сўкишса ҳам, уришса ҳам кулиб туради. Техникаси юқори эканлигини, ўзига берилган 10 дақиқа ичида исботлай олди. Балки у клубда яхши ҳаракат қилмас, аммо мазкур ёшдаги терма жамоа айнан уники эди. Урган голи ва кейинги дақиқалардаги "пас"лари шунчаки эмас, ўйлаб қилинган ҳаракатлар эди.

Жалолиддин Машарипов ("Пахтакор")
"Замах"ни қойиллатадиган футболчи, ўзини 90 дақиқалик ўйинчи эканлигини исботлай олди. Унга мана шундай узоқ дақиқалар етишмади. Яман дарвозасига гол ургунига қадар, тўрт марта "обводящий удар"ни (айлантинма зарба) қўллади. Бешинчисида кирди, бешинчисигача эса рақибни бўш нуқтасини топа олди. Ироқ ва Жанубий Кореяни текшириб олиш учун унга вақт етмади.