U-17 ЖЧ: Ўзбекистон U-17 - Панама U-17 (превью)

Ўзбекистон амалдаги Осиё чемпиони сифатида ўсмирлар ўртасидаги жаҳон чемпионатида иштирок этмоқда. Қайд этиш жоиз, бу Ўзбекистоннинг ушбу ёш тоифасидаги мундиалдаги кетма-кет иккинчи иштироки ҳисобланади. 2011 йили Мексикада бўлиб ўтган баҳсларда Алексей Евстафеев қўл остидаги терма жамоа чорак финалгача етиб борганди.

Нуралиев шогирдлари 15 октябрь куни «С» гуруҳи ўйинлари бўлиб ўтадиган Фужайра стадионида ўзининг дастлабки машғулотларини ўтказди. 17 октябрь, пайшанба куни эса Ўзбекистон ўсмирлар терма жамоаси бош мураббийи Дилшод Нуралиев ва сардор Отабек Шукуров ўйинолди матбуот анжуманида иштирок этди.

Эслатиб ўтамиз, Дилшод Нуралиев бош мураббийлигидаги Ўзбекистон U-17 ўсмирлар терма жамоаси Жаҳон чемпионати гуруҳ босқичи ўйинларини 18 октябрь куни Панама ўсмирлар терма жамоасига қарши ўйин билан бошлайди. Илк ўйинда Ўзбекистон ўсмирлари оқ рангли либосларда майдонда ҳаракат қилишса, панамалик ўсмирлар қизил рангли либосларда майдонга тушишади.

Гуруҳдаги 2-тур ўйини 21 октябрь куни Марокаш ўсмирларига қарши бўлиб ўтса, 24 октябрь куни 3-турда Нуралиев шогирдлари Хорватияга қарши майдонга тушади. Гуруҳ босқичидаги барча ўйинлар Фужайра стадионида бўлиб ўтади.

Қуйида Ўзбекистон ўсмирлар терма жамоаси бош мураббийи Дилшод Нуралиев билан бўлиб ўтган интервью ва Фужайрадаги тўртинчи кун дастуридан ўрин олган машғулотлар ҳақидаги видеоролик ҳамда Ўзбекистон - Панама учрашувига бағишланган промороликни томоша қилишингиз мумкин.

U-17 ЎСМИРЛАР ЎРТАСИДА ЖЧ.
18 ОКТЯБРЬ. «ФУЖАЙРА» СТАДИОНИ. (21:00)
ЎЗБЕКИСТОН (U-17) - ПАНАМА (U-17)
Бош ҳакам: Даниел Беннет (ЖАР)
Лайнсменлар: Ранге Марва (Кения), Сивел Закхали (ЖАР)
Захира ҳаками: Вейса Бамалку (Эфиопия)