Тошкент шаҳрида Ўзбекистон футбол ассоциацияси томонидан футбол фестивали ўтказилди
01 июн 2018 15:52
Янгиликлар

Тошкент шаҳрида Ўзбекистон футбол ассоциацияси томонидан футбол фестивали ўтказилди

Барчамизга яхши маълумки, 1 июнда “Халқаро болаларни ҳимоя қилиш куни” кенг нишонланади.

Ушбу байрам катталар учун болажонларнинг орзуларини ушалтириш, улар учун қўлимиздан келган барча яхшиликларни қилишимиз учун кенг имкониятдир.

Бу байрамда юртимиз бўйлаб турли концертлар, экскурсиялар, турли мусобақалар ташкил қилиниши анъанага айланган. Ушбу анъанага риоя қилган ҳолда Ўзбекистон футбол ассоциацияси Тошкент шаҳрининг “Бунёдкор” стадионида болалар учун катта футбол фестивалини ташкил қилди. Фестивалда умумтаълим мактабларининг 7 ёшдан 12 ёшгача бўлган 100 дан ортиқ ўғил ва қизлар иштирок этишди.

Тадбирнинг асосий мақсади болажонларни футболнинг сир-асрорлари билан оз бўлсада таништириш эди. Фестивалга таклиф қилинган мураббийлар болаларни гуруҳларга бўлган ҳолда тўп билан бажариладиган турли машқлар ҳамда топшириқлар бердилар. Бу машқларни аъло даражада бажарган болакайлар ўзларини майдонда профессионал футболчилардек ҳис қилдилар.

Майдонда тўп суриш имконига эга бўлган болажонлар ҳар бир топшириқни бажариб бўлгач бир-бирларини завқу-шавқ олқишлаб турдилар. Бу эса бугунги кунда юртимизда футбол спортнинг энг оммабоп турига айланганидан далолат беради. Дархақиқат бугун ташкил этилган футбол фестивали бунинг ёрқин мисолидир.

Футбол фестивалининг сўнгида барча иштирокчиларга футбол тўплари совға қилинди. Фурсатдан фойдаланиб Ўзбекистон футбол ассоциацияси юртимиздаги барча болажонларни ушбу байрам билан чин дилдан муборакбод этади.