Текинга ишлаётган мураббий ҳақида
01 дек 2018 10:27
Янгиликлар

Текинга ишлаётган мураббий ҳақида

Апеннин ярим оролида ўзига хос ҳаётий принципларга эга футбол мураббийи фаолият кўрсатмоқда.

Сильвио Бальдини – кўпчиликка нотаниш, билганларнинг ҳам ёдидан кўтарилиб улгурган мураббийлардан бири ҳисобланади. Охирги 15 йил давомида у тўрт бор А Серияга қайтди: "Эмполи" билан (ҳужумда Томмазо Рокки ва Тото Ди Натале ўйнарди) 2002 йилда, "Парма" билан 2004 йилда, 2005 йил "Лечче" ва 2007 йили "Катанья" билан.

"Катанья"да мураббийнинг "кетмони учмади" ва натижалар мақтанишга арзигулик эмасди – Бальдини мавсум якунига етмай истеъфога чиқарилди. Шунга шхшаш картина Лечче ва Пармада ҳам юз берганди.

2017 йилдан Сильвио С Серия вакили "Каррарезе" бош мураббийи ҳисобланади. Эътиборли жиҳати шундаки, Сильвио меҳнати учун умуман маош олмайди. Бугунга келиб, "Каррарезе" мусобақа пешқадами бўлиб турибди. Жамоа натижаларида Массимо Маккароне ва Франческо Тавано муҳим роль ўйнашмоқда.

"Мен ўзим севган иш билан машғулман. Ҳеч ким келиб асабимга тегмайди, қандай қилиб бундай гол қўйворганимиз ёки фалончи футболчини нега майдонга туширмаганим борасида тергамайди. Фойдасиз, фақат муносабатлар ёмонлашиши ва асаб толалари узилишига сабаб бўлувчи саволлар йўқ.

Мен ҳомийларга, менга ойлик тўлаётган, жамоага пул бераётган одамга ҳеч нимани тушунтиришга, ҳисобот беришга мажбур эмасман. Чунки ҳеч ким менга маош тўламайди. Футболга инвестиция киритаётган ишбилармон билан тил топишиш мушкул вазифа. Ҳеч қачон жамоаси бош мураббийини эркин қўйиб қўйган, унинг ишига умуман аралашмайдиган президентни кўрмаганман.

Ҳаётта сен ё ғалаба қозонасан, ё ниманидир ўрганиб оласан. Фақат ғалаба ёки мағлубият бор, бошқа вариант йўқ дейдиганлар, эртами-кечми қаттиқ адашаётганларини тушуниб етадилар. Бир марта берилувчи ҳаётинг ўтиб борар экан, кундан-кунга тушуниб, англаб борасанки, инсон фақат ўзи ёқтирган ишлар билан машғул бўлиши лозим.

Мен ўзим ва оилам учун ишлаб, пул топиб бўлдим. Тўғри, бугунги кунда турли клубларда ишлаётган ҳамкасбларим билан солиштирганда бу сариқ чақа. Мен 2380 евро нафақа пули оламан, бу жуда кам дерсиз, лекин бошимни тик тутиб, хотиржам яшайман".