Суперлига. Мавсумнинг иккинчи ярми учун тақвим қандай бўлади?

Клуб августнинг айнан қайси санасида майдонга тушишини аниқлаштириш учун Ўзбекистон кубогининг 1/4 финал босқичига қуръа ташланиши керак эди. Куз ойи тақвими эса Элит Чемпионлар лигаси ва Чемпионлар лигаси ИИ мусобақалари билан боғлиқ. 15-16-августда уларнинг гуруҳ босқичига қуръа ташланади.

Август ойида қандай режа ва ўзгаришлар бор?

Лига биринчи галда U-23 Ўзбекистон термасининг Париж Олимпиадасидаги иштирокидан келиб чиқди. Масалага оптимистик руҳда ёндошиб, термамизнинг 1/2 финалга қадар етиб бориши мумкинлиги инобатга олдик. Лига "Сурхон" арена майдони ва унда алоҳида VAR хонасининг ишга тушиши масаласи катта эҳтимол билан август ойига қадар тайёр бўлмаслиги масаласини кун тартибига киритди. "Локомотив" ва "Пахтакор" стадионларини таъмирлаш зарурияти бор эканлиги ҳисобга олинди. Бунда Самарқанд шаҳридаги "Динамо" стадионини фойдаланишга қайта топшириш масаласи муҳим аҳамият касб этади.

Аксар ҳолатларда бир стадиондан икки клуб фойдаланаётганини инобатга олиб, ўйинлар орасидаги танаффус ва майса парвариши масаласини ҳам эътибордан четда қолдириб бўлмайди.

Шу ва бошқа қатор сабаблар инобатга олиниб, август ойи учун режа ишлаб чиқилди. Лига бунда ҳар бир деталга эътибор қаратишга интилди. Иш режа суратда акс этган.