Сречко Катанец: "Ҳужум чизиғимиз яхши ҳолатда, аммо ҳимояда катта муаммоларимиз бор"

Бироз аввал Шаҳбоз Умаров коронавирус сабаб йиғинга келмагани ҳақида хабар берган эдик.

Ўзбекистон МТЖ. Шаҳбоз Умаров коронавирусга чалинди ва терма жамоа ихтиёрига кела олмади

Бугун Сречко Катанец бошчилигидаги терма жамоамиз дастлабки машғулотни ўтказмоқда. "Пахтакор" стадионида ўтаётган машғулот 17:15да старт олган. Машғулот бошланишидан олдин бош мураббий Сречко Катанец журналистларга қатор фикрларини билдириб ўтди.

"Грузияни жуда ҳам яхши рақиб, деб ҳисоблайман. Биз учун яхши синов бўлади. Таркиб бўйича гапирадиган бўлсам асосан марказий ҳимоя чизиғида муаммоларимиз бор. Жумладан, Рустам Ашурматов виза билан муаммолар сабаб етиб кела олмади. Бундан ташқари, Шаҳбоз Умаров коронавирусга чалинганлиги боис келмади. Биз эса ўзимизда бор футболчилар билан ушбу ўйинни ўтказамиз", - дея дастлабки фикрларини билдириб ўтди мутахассис.

"Ўзбекистонга келишдан аввал фақатгина Элдор Шомуродовни билар эдим. Қолган ёш футболчилар ҳақида гапирсак барчаси мен учун янгилик бўлди. Биз уларга кўпроқ вақт беришимиз керак. Улар хато қилса ҳам имкон беришда давом этишимиз зарур. Шундан кейингина улар терма жамоага кўникиб кетиб, бизнинг ўйинимизни кучайтириши мумкин.

Ҳозир ҳужум чизиғимиз жуда ҳам яхши ҳолатда, деб айтишимиз мумкин. Лекин биз алоҳида футболчиларга таянган ҳолда эмас, балки бутун жамоани шакллантиришимиз керак. Ҳозирда ҳужум чизиғи яхши бўлса ҳам, ҳимоя ҳақида бундай демаган бўлар эдим. Ҳозир ҳимоя чизиғимизда анча катта муаммолар бор. Эндиги мақсадимиз ҳимоя чизиғини кучайтирган ҳолда яхлит жамоани шакллантириш", - деди Сречко Катанец.