"Шармандалик, бу шармандалик!"

2009 йилги УЕФА чемпионлар лигаси ярим финалида Хосеп Гвардиола бошчилигидаги "Барселона" Гус Хиддинк бошқарувидаги "Челси" билан тўқнаш келганди. Каталонияда кечган биринчи баҳсда ҳисоб очилмаган ва барчаси "Стемфорд Бридж"да ҳал бўлиши ойдинлашган. Жавоб ўйини эса ҳакам туфайли неча йил ўтса ҳам муҳокамаларга сабаб бўлмоқда.

Лондондаги учрашувнинг 9-дақиқасида Майкл Эссьен супергол урди - 1:0. Биринчи таймининг ўзидаёқ баҳсли вазиятлар юзага келди. Ҳар икки ҳолатда ҳам "Челси" футболчилари "Барселона" дарвозасига пенальти белгилашни талаб қилишди — аввал майдонга Малуда йиқилди, кейин эса Дрогба. Sky Sports кейинчалик ҳар бир баҳсли эпизодни батафсил таҳлил қилди ва телеканал экспертлари фикрича: биринчи вазиятда пенальти беришга асос йўқ эди, иккинчи вазиятда эса пенальти белгиланиши керак эди. Сабаби Абидаль Дрогбанинг йўлини тўсиб қўйганди.

Танаффусдан кейин эса ҳақиқий томоша бошланди. 60-дақиқада Дрогба яна рақиб жарима майдонида йиқилди, аммо ўша эпизодда Туре томонидан фол бўлган тақдирда ҳам, у жарима майдони ташқарисида эди.

Кейин эса Эвребе яна битта катта хато қилди — Абидални "сўнгги умид фоли" туфайли қизил карточка билан майдондан чиқариб юборди. Аслида эса Анелька ўз оёғига ўзи қоқилиб йиқилганди, бу такрорий лавҳаларда жуда яққол кўринган.  

"Барселона"нинг қутқарувчи голигача бўлган вақтда тўп каталонликлар жарима майдони ичида Пикенинг қўлига тегди. Пике қўлини очиқчасига ён томонга чўзган ва жарима майдони ичида турганди. Экспертлар фикрича, бу 100% пенальти эди.

Бу эпизод ҳам тез унутилиб кетган бўларди, агар қўшиб берилган дақиқаларда Иньеста "Барселона"ни қутқариб қолмаганида. Ўша лаҳзада "Стэмфорд Бридж"даги ҳарорат чўққига чиқди: меҳмонлар хурсандчиликдан телбадек югуришарди, мезбонлар эса ғазабдан жинни бўлишди.

Гол ўтказиб юборгандан кейин Эвребе "Челси"га охириги ҳужум уюштиришга имкон берди, бу ҳужум яна пенальти талаб қилиш билан тугади — Баллакнинг зарбасидан кейин тўп жарима майдони ичидаги Это’Онинг қўлининг орқа томонига тегиб қайтади. Ҳакам хотиржамликни сақлаб қолишга уринарди, лекин Баллак ва Дрогба унга ташланганда буни уддалай олмади. Ҳозиргача уларни майдоннинг ўзидаёқ ҳакамни уриб-тепиб ташламаганлари ҳайрон қолдиради. Немис ва африкалик футболчи гўё ҳакамни тириклайин еб қўйишга тайёр эди.

Учрашув якунланиши билан Дрогба ТВ камераларига қараб, кўзларини катта-катта қилиб "шармандалик, бу шармандалик! деб бақиради.  

Энг муҳими — ўйиндан кейин ҳакамни таҳдидларга кўмиб ташлашди. Унга қўнғироқ қилишди, SMS ва хатлар ёзишди, уларнинг оҳангини тасаввур қилиш қийин эмас эди. Эвребе бир неча бор ўлдириш билан қўрқитишганини, жумладан бутун оиласини йўқ қилиб ташлаш билан таҳдид қилишганини тан олганди. Финалдан кейинги дастлабки кунлар у қўрқув ичида яшади, кейинчалик кўникиб қолди. Бир неча йил ўтиб Эвребе ҳали ҳам "Челси" мухлисларидан ҳақоратли хатлар олиб турганини айтди.

2023 йилда норвегиялик ҳакам еврокубоклардаги янги қоидалар ҳақида афсус билан гапирганди: "Қани эди, ўша пайтда VAR бўлганида", — деганди у. Ҳақиқатан ҳам, VAR ўша ўйиннинг боришини бутунлай ўзгартирган бўларди ва эҳтимол, ҳисоб ҳам, натижа ҳам бошқача бўларди. Лекин "Барселона" ва "Челси" ўртасидаги тўқнашув айнан шу кўринишда футбол тарихига кирди. 


УЕФА чемпионлар лигаси. 1/2 финал. Жавоб ўйини
"Челси" (Англия) — "Барселона" (Испания) — 1:1
6 май 2009 йил. Лондон. "Стэмфорд Бридж" стадиони. 37 857 томошабин.
Бош ҳакам: Том-Хеннинг Эвребе (Норвегия).
Голлар: Эссьен, 9 (1:0). Иньеста, 90+3 (1:1).
"Челси": Чех, Э.Коул, Терри, Алекс, Босингва, Анелька, Эссьен, Баллак, Лэмпард, Малуда, Дрогба (Беллети, 72).
"Барселона": Виктор Вальдес, Даниэл Алвес, Пике, Яя Туре, Абидаль, Месси, Бускетс (Кркич, 85), Кейта, Хави, Иньеста (Гудьонсен, 90+6), Это'О (Силвинью, 90+7).
Огоҳлантиришлар: Д Алвес 30, Эссьен 74, Алекс 77, Это'О 90+1, Иньеста 90+3, Баллак, 90+6, Дрогба (ўйин тугагач).
Четлатиш: Абидаль 66.
Биринчи ўйин — 0:0.