Салим Мустафоев: “Ҳаммаси ўз қўлимизда”

Ўзбекистон терма жамоаси чап қанот ҳимоячиси Салим Мустафоев дастлабки ўйинда захирадан майдонга тушди. Унинг дуранг билан тугаган учрашув ҳақида фикрларини билишга уриндик.

- Охирги йилларда Гонконг терма жамоаси биз учун ноқулай рақиб бўлиб келмоқда. Ёдингизда бўлса, ўтган Осиё ўйинларида улар бизни мағлуб этишганди. Кейин миллий терма жамоамиз билан ҳам дуранг ўйнаганди. Бутун ўйин давомида ҳимояда “ётиб” олган жамоа билан ўйнаш қийин – дея гап бошлади Мустафоев.

- Аслида ўйиндан олдин тайёргарлик яхши бўлганди. Бу ерга келишимиздан олдин ҳам бир қатор йиғинлар ташкил этилиб, синов-назорат ўйинлари ўтказилганди.

- Гонконг билан ўтказган ўйинимизни кўрган бўлсангиз, гол уриш учун жуда кўплаб имкониятлар бўлди. Бироқ уларни голга айлантиришда омад юз ўгирди. Йигитлар яхши ўйнашди. Улар қўлдан келганича ҳаракат қилди.

- Ғалаба учун фақат-фақат омад етишмади деб ўйлайман.

- Табиийки, дуранг бизни қониқтирмади. Кайфиятимиз ҳам ҳозир шунга яраша бўлиб турибди. Тайёр ғалабани қўлдан бой бердик. Мухлислар биздан шу куни ғалаба кутганди. Биз ҳам ўз навбатида уч очко олишни мақсад қилгандик.

- Инчеонда бизни илиқ кутиб олишди. Шароитлар ҳам аъло даражада. Ҳеч қандай муаммо йўқ.

- Гонконг билан ўйинда захирадан майдонга тушаётганимда, мураббийлар томонидан шундай кўрсатма берилгандики, ҳимоядаги ишни қилиш билан бир қаторда олдинга ўтиб, ҳужумчиларни тўп билан таъминлаш вазифаси юклатилганди.

- Ўз гуруҳимизда биринчи ўринни эгаллаган холда кейинги босқичга чиқишни мақсад қилганмиз. Ҳали ҳеч нарса йўқотилгани йўқ. Ҳаммаси ўз қўлимизда. Бунинг учун қолган иккита учрашувда йирик ҳисобда ғалаба қозониш талаб этилади. Буни амалга оширишга уринамиз – дейди Мустафоев.


Исломбек Рустамбеков суҳбатлашди