Рио Фердинанд: "Агар бу иккисини бирлаштирсак, дунёнинг энг зўр футболчиси пайдо бўлади"

Рионинг фикрича, "Манчестер Юнайтед"даги омадли стартдан сўнг Ван-Биссака АПЛнинг энг яхши қанот ҳимоячиларидан бири деб ҳисобланиши керак.

"Кристал Пэлас" собиқ аъзоси ёзда "Олд Траффорд"га кўчиб ўтганидан сўнг ўзини жуда яхши кўрсата олди. Хусусан, яқиндагина "Манчестер Сити"га қарши кечган учрашувдан кейин ҳам Аароннинг ўйинига юқори баҳолар қўйилди. Ўшанда у Раҳим Стерлингни зарарсизлантира олганди.

"Ливерпуль" аъзоси Александр-Арнольдни кўпчилик Премьер-лиганинг энг яхши қанот ҳимоячиси деб ҳисоблайди. Фердинанднинг фикрича эса, Ван-Биссака ўйин даражаси бўйича Трентдан орқада эмас.

"Агар бу икки ўйинчи (Ван-Биссака ва Александр-Арнольд)ни бирлаштирсак, дунёнинг энг зўр футболчисини қўлга киритамиз", - дея ўзининг "Instagram" саҳифасида саволларга жавоб берди Фердинанд.

"Аарон якка курашларда жуда яхши. Унинг Стерлингга қарши қандай ўйнаганини кўрдим, Раҳим эса истаган рақибни алдаб ўта олади. Лекин, Ван-Биссака билан буни қилиш унга катта қийинчилик туғдирди.

Бирга-бир ўйинда у куч ва тезлик борасида рақибга имкониятни бой бермайди. Агар рақиб ундан қочмоқчи бўлса, подкат ташлайди.

Агар "Манчестер Юнайтед"да талаб қилинадиган бўлса, у 3 марказий ҳимоячи тактикасида ўнгроқдаги жойни ёпа олади. Менимча, у бу ролни қойилмақом тарзда бажара олади.

У тўп билан Трент каби яхши ҳаракат қила олмайди, лекин Трент ҳимояда бирга-бир ўйинда Ааронга катта фарқ билан имкониятни бой беради. Шундай экан, агар уларни бирлаштирсак, мукаммал машинага эга бўламиз".

"Бу ўйинга боғлиқ. Агар мен кўпроқ ҳимояланишим ва қайсидир вингерни ёпишим керак бўлса, унда мен Ван-Биссакани танлайман".