Қирғизистон чемпионатида ишлаётган ўзбекистонлик мураббий билан суҳбат

Сайтимиз мухбири ушбу мураббий билан боғланиб, интервью ташкил этди. Қуйида интервьюнинг тўлиқ матни билан танишинг.

- Сизни Қирғизистон чемпионатида фаолият олиб бораётганингиз ҳақида эшитдик, бу тўғрими?
- Ҳа тўғри. Мен август ойида Қирғизистон чемпионатида иштирок этувчи "Лидер" жамоасига кўчиб ўтдим.

- Айтингчи, "Локомотив-БФК" жамоасидан кетишингизга нима сабаб бўлди?
- "Лидер" жамоаси раҳбарияти менинг хизматларимга қизиқиш билдиришди. Яхши шартнома таклиф қилишди. Шартнома шартлари менга маъқул келди ва бу жамоа билан битим туздим. Биласизми, менда Қирғизистон чемпионатидан иккита таклиф бор эди. "Лидер" жамоаси раҳбарияти менга ишлаш учун яхши шароит ва имкониятларни яратиб беришга ваъда қилишгани боис, якунда бу жамоани танладим.

- "Лидер" жамоаси ҳақида айтиб берсангиз...
- Қирғизистон чемпионати иштирокчиси "Лидер" жамоаси ҳали ёш ва энди шаклланаётган футбол клуби. Жорий мавсум жамоа учун тажриба йили бўлди. Дастлаб жамоага Россиядан мураббий таклиф қилинганди, бироқ у мураббий жамоада ишлаб кета олмади. Шундан сўнг улар ўзбекистонлик мураббий билан ишлашга қарор қилишди. Сабаби бу икки халқ ўртасидаги менталитет бир-бирига яқин, шунингдек жамоа раҳбарияти аввалдан менинг хизматларимга қизиқиш билдираётган эдилар. Жамоани шакллантиришда менга ўзбекистонлик футболчилар Искандар Мўминов ва Арслон Султоновлар катта ёрдам беришди. Раҳбарият томонидан келаси мавсумда камида кубок ярим финалигача етиб бориш, чемпионатда кучли учликка кириш вазифаси қўйилди.

- Бу жамоа билан қанча муддатли шартнома имзоладингиз?
- "Лидер" жамоаси билан икки йилга мўлжалланган шартнома имзоладим. Ушбу шартнома шартлари мен учун маъқул келди.

- Собиқ жамоангиз "Локомотив-БФК" ҳақида фикрларингиз...
- "Локомотив-БФК" жамоасидан илиқ хотиралар қолган. Менга юқори ўринлар учун кураша оладиган жамоа билан ишлаш имкониятини тақдим этгани учун Муслим Пирмухаммедовга миннатдорчилик билдирган бўлардим. Жамоа йигитлари бизнинг бошлаган ишимизни муваффақиятли тарзда охирига етказа олганликлари учун жудаям хурсандман. Улар менинг меҳнатларимни зое кетказишмади, ўз гуруҳларида 2-ўринни ўринни қўлга киритишди.

Биласизми, Қирғизистон чемпионатида ўзбекистонлик мураббийнинг фаолият олиб бориши - бу Марказий Осиё мураббийларига бериладиган баҳо ҳисобланади. Мени қўллаб-қувватлаётганликлари учун Қирғизистон футбол федерациясига ташаккур изҳор қиламан. Жамоамиз йигитларига ҳам катта раҳмат!

Бекзод Толибов суҳбатлашди.