Пресс клуб раиси ЎФФ бош котибига рамзий маънодаги мухлислар ишончини совға қилди (фото)

Ушбу сессияда иштирок этаётган ЎФФ бош котиби Сардор Раҳматуллаев сентябрь ойида мамлакат футболида ўзгаришлар бўлишини айтди:

- Аввалам бор ЖЧ-2018 йўлланмаси учун кураш олиб бораётган Ўзбекистон терма жамоаси ҳақида гапирмоқчиман. Ҳа, хатолар бор, аммо бизда мундиалга тўғридан-тўғри чиқиш имконияти бор. Бугунги кунда мамлакат футбол федерацияси ва мураббийлар штаби ушбу вазифани бажариш учун бор кучини ишга солмоқда. Мураббийлар штабидаги ёки ЎФФдаги истеъфолар ҳақида тўхталадиган бўлсак, ижро қўмитаси буюроси мураббийлар штабига ишини охиригача бажаришга имкон берди. Сентябрь ойида ҳисобот-сайлов конференцияси бўлиб ўтади. Унда Ўзбекистон футбол федерациясининг янги таркиби танланади. Ўзбекистонда футболни ривожлантириш тизимининг янги концепцияси ишлаб чиқилди ва бу конференцияда концепция тасдиқланади. Янги тузилма, янги бошқарув таркиби, ПФЛда ўзгаришлар, болалар ва ўсмирлар футболини ривожлантириш. Бу программа 2017-2020 йилларга мўлжалланган. Бизда нафақат катталар терма жамоаси, балки ёшлар ва ўсмирлар терма жамоаси ҳам турли турнирларга тайёргарлик кўрмоқда.

Ўзбекистон терма жамоаси мавзусига қайтадиган бўлсак, натижа учун фақатгина бош мураббий эмас, балки ЎФФ ҳам жавоб беради.

Халқаро Пресс-клуби раиси Шерзодхон Қудратходжаев мухлис тақдим этган шарни ЎФФ бош котиби Сардор Раҳматуллаевга топширди. Шарга "ишонч" сўзи ёзилган эди.