Ўзбекистон U-22 терма жамоаси ўртоқлик ўйинида Хитой U-22 ёшларини мағлуб этди

Хитойнинг Шанхай шаҳрида навбатдаги йиғинини ўтказаётган Ўзбекистон U-22 ёшлар терма жамоаси бугун режага мувофиқ Хитой U-22 ёшлар терма жамоасига қарши ўртоқлик учрашувини ўтказди. Ўйиннинг иккинчи бўлими 68-дақиқасида Игорь Сергеев боши билан берган зарбадан сўнг ўйинда ҳисоб очилди. Қолган дақиқаларда ҳисоб ўзгармади ва Сергеевнинг ягона голи Ўзбекистон U-22 терма жамоасига ғалаба келтирди.

Ўзбекистон ва Хитой ёшлар терма жамоалари аввалдан режалаштирилганидек 24 июнь куни ўзаро иккинчи ўртоқлик ўйинида майдонга тушадилар. Иккинчи учрашув Шанхай яқинидаги Вуси шаҳрида бўлиб ўтади. 22 июнь куни Мақсудов шогирдлари Шанхайдан Вуси шаҳрига йўл оладилар ва машғулотларни ўша ерда давом эттирадилар.

Эслатиб ўтамиз, Шуҳрат Мақсудов бош мураббийлигидаги Ўзбекистон U-22 терма жамоаси 18 июнь куни ўзининг навбатдаги ўқув-машғулот йиғинини ўтказиш учун Хитойнинг Шанхай шаҳрига учиб кетган эди. Терма жамоа бош мураббийи мазкур йиғинга жами 23 нафар футболчини жалб этган.

Ўртоқлик учрашуви. 21 июнь. Шанхай (Хитой).
ХИТОЙ (U-22) – ЎЗБЕКИСТОН (U-22) – 0:1
Гол: Игорь Сергеев (68).
Ўзбекистон U-22: Акмал Турсунбоев, Тохир Шамсиддинов (Максимилан Фомин 83), Бобурбек Йўлдошев (Муҳсин Убайдуллаев 90+2), Сардор Раҳмонов, Жавлон Мирабдуллаев, Сардор Собирхўжаев (Абдуллох Олимов 65), Аббос Махсталиев, Владимир Козак (С), Жамшид Искандеров, Диёр Туропов (Темур Ҳакимов 46), Игорь Сергеев (Жасурбек Ҳакимов).
Четлатиш: Сардор Раҳмонов (41).