Ўзбекистон – Қатар меморандуми, Осиё жавоҳири - "Aspire" академияси билан ҳамкорлик

Ана шу ташриф чоғида Аҳмаджонов дунёнинг энг яхши футбол академияларидан бири ҳисобланган "Aspire"га ва спортга ихтисослашган тиббиёт маркази "Aspetar"га ташриф буюрди. Умид Аҳмаджоновнинг сўзларига кўра, ЎФФ мамлакатда болалар-ўсмирлар футболини ривожлантириш мақсадида ушбу академия билан яқин ҳамкорликни йўлга қўйишни режалаштирган.

Қатар ва Ўзбекистон ўртасида имзоланган меморандумнинг бизга маъқул келган жиҳати, энди ЎФФ бевосита Осиёнинг энг кучли структурасига эга бўлган "Aspire" академияси билан ҳамкорлик қилади.

Ўз навбатида, "Aspire"ни ўз кўзи билан кўрган инсон сифатида академия ҳақидаги мақолани эътиборингизга ҳавола этаман.

2016 йил январь ойида Қатарда ўтган U-23 Осиё чемпионатини бевосита ўша ердан ёритган эдик. Ўшанда "Aspire" академиясида ўтган "Лаҳвия" - "Зенит" учрашувини бевосита кузатиб борган эдик. Очиғи, ўшанда "Зенит"дек жамоа иштирокидаги ўйиндан кўра академия мени ўзига кўпроқ ром этган эди. У ерга кеч тушиб қолган бир пайтда борганимиз учун тўлиқ танишиб чиқиш имкони бўлмаган, лекин умумий хулосалар ва "Aspire" ҳақида тасаввурга эга бўлиш учун қисқа танишиб чиқиш етарли бўлган.

"Aspire" академияси Қатар пойтахти Доҳанинг Ал-Вааб туманида жойлашган, умумий майдони 250 гектарни ташкил қилади. Дунёдаги энг катта ва энг бой ушбу академия бор йўғи 20 ойда қуриб битказилган. Қурилиш жараёнида еттита қурилиш компанияси кунига 24 соатдан ишлаган.

Академияда 14та футбол майдони, 40га яқин турли спорт турларига мўлжалланган майдонлар мавжуд. Кўплаб спорт турлари билан шуғулланиш учун шароитлар яратилган бўлишига қарамай академиянинг ўзи асосан футбол, енгил атлетика, стол тенниси, сузиш, гимнастика ва қиличбозлик спорт турларига йўналтирилган. Академияда Олимпиада ўйинлари талабига жавоб берадиган сув ҳавзаси ҳам бор. Академия ҳудудида спорт лабороторияси ҳам фаолият юритади.

Бу ерда дунёнинг турли мамлакатларидан 100дан ортиқ мураббийлар ёшлар учун машғулот ўтказишади. Ҳар бир спорт турига қараб мураббий олиб келинган. Мисол учун стол тенниси учун Хитой ва Сингапурдан, футбол учун Голландиядан мураббийлар олиб келинган.

Академиядаги болаларни руҳлантириш, улардаги ғолибликка бўлган интилишни ошириш мақсадида машҳур жамоаларнинг айнан шу ерда йиғин ўтказишига қулай шароитлар яратиб берилган. "Бавария", "Зенит", "Барселона" ва яна кўплаб топ клублар шу ерда йиғин ўтказишади.

Германиянинг "Бавария" клуби 8 йилдан бери қишки йиғинни айнан Қатардаги "Aspire" академиясида ўтказади. Мюнхенликларнинг Доҳада ўтказган ўтган йилги йиғини давомида клубнинг ўша пайтдаги спорт директори Матиас Заммер "Бавария" расмий сайтига берган интервьюсида қуйидаги фикрларни билдирган эди: "Бавария" кетма-кет еттинчи йил Қатарда йиғин ўтказмоқда. Бу ерда фантастик шароитлар мавжуд. Спортзаллар, тикланиш учун барча ускуналар - барчаси идеал". Кўриб турганингиздек, дунёнинг энг катта клубларидан бирининг собиқ спорт директори у ердаги шароитлар фантастик даражада эканлигини таъкидлаган.

Умуман олганда Доҳа Европанинг "йирик" жамоалари йиғин ўтказиши учун идеал жой. Яхши шароит, қулай об-ҳаво, мухлислардан ҳоли маскан.

"Aspire" академияси билан тўлиқ танишиб чиқиш учун бир кун сарфлашга тўғри келади, афсуски ўшанда бизда бундай имконият бўлмаган. Академиянинг яқинида меҳмонхона ҳам бор, йиғин ўтказиш учун келган жамоалар ўша меҳмонхонага жойлашадилар.

Машғулот пайтида ҳам барча хизматлар йўлга қўйилган, ҳаммаси аъло даражада. Спортчилардан фақат шуғулланиш талаб этилади холос.

Бу футбол жавоҳири бўлган "Aspire" академияси ҳақида сизга илинганларимиз эди.

Эслатиб ўтамиз, ФИФА 2022 йилги Жаҳон чемпионати мезбонлигини айнан Қатарга топширган. Мундиал пайти "Aspire" академияси энг асосий обьектлардан бири бўлади.

Толибжон Қосимов