O'yin haqida
- Mazkur o'yinda g'alaba qozonishimiz kerak edi. Mashg'ulotlarda raqib qanday o'yin ko'rsatishini bilgan holda tayyorgarlik ko'rdik. To'g'risi, jamoaga omad yetishmadi. Ko'plab imkoniyatlarga ega bo'ldik. Shunday bo'lsa-da, yigitlarga minnatdorchilik bildiramiz. Bizda yaxshi futbolchilar yig'ilgan. Nazarimda, jamoamizga ozroq ishonch yetishmayapti. Bazida qandaydir qo'rquv bilan maydonga chiqyapmiz.
- “Mashal” Superligaga chiqishdan umid uzdimi??
- Men bunday fikrga qo'shilmayman. Keyingi bosqichga jamoamiz boshqacha tayyorgarlik ko'radi. Jamoaning asosiy maqsadi, har bir o'yinda muvaffaqiyat qozonish. Balki jamoa pley-off bahslarida 3-o'rinni qo'lga kiritgan holda Superligaga chiqishi mumkin. Futbolda oldindan hech nima deb bo'lmaydi. Yigitlar o'zlariga bo'lgan ishonchni qaytarib olsa, o'ylaymanki, biz vazifani bajara olamiz.
- Jamoangiz bugun jismoniy tomonlama raqibga yutqazib qo'ydimi?
- O'ylaymanki, biz “Andijon”ga qarshi o'yinda jismoniy tomonlama yutqazganimiz yo'q. Jumladan, “So'g'diyona” bilan kubok bahsida ham ularga bu borada yutqazmadik. Oxirigacha kurashdik.
- Sizningcha, Pro ligadagi eng kuchli jamoa?
- Menimcha, Pro ligada kuchsiz jamoa umuman yo'q. Hammasi kuchli. Birortasini osonlikcha yuta olmayapmiz. Bir so'z bilan aytganda, Pro ligada kuchli yoki kuchsiz jamoaning o'zi yo'q. Hammada birdek kuch mavjud.
- “Mashal”ning qarzorligi bormi?
- Bu borada hech qanday qarzdorlik yo'q. Klubimiz sentyabr oyigacha bo'lgan barcha maosh va mukofot pullarini bergan. Buning uchun homiylarga o'z minnatdorchiligimizni bildiramiz. Umuman olganda, tashkiliy masalalarda ham hammasi joyida.
