Осиё хабари. Кейруш терма жамоани Осиё Кубогига тайёрлайди

Яқинда Эрон термаси устози Карлуш Кейруш билан тузилган шартнома янгиланди. Шартларга кўра португалиялик мураббий 2018 йилги жаҳон чемпионатининг охирига қадар форсларни бошқаришда давом этади. Ўзаро шартноманинг тўлиқ шартлари 1 август куни маълум бўлади.

Бу ҳақда Карлуш Кейруш шундай деди: “Эрон футбол федерацияси билан янги шартнома бўйича келишиб олдик. Менга бу ерда ишлаш ёқяпти ва терма жамоани бошқаришда давом этмоқчиман”.

Португалиялик мураббий бошчилигида эронликлар жаҳон чемпионатида иштирок этиб, Нигерия билан 0:0 ўйнашди ҳамда Аргентинага 0:1, Боснияга эса 1:3 ҳисобида мағлуб бўлишди.

Энди форсларнинг бор эътибори келаси йилнинг январь ойида Австралияда бўлиб ўтадиган Осиё Кубогига қаратилади. Терма жамоа олдига қўйилган мақсад – мусобақада ғолиб чиқиш. Эрон термаси “С” гуруҳида БАА, Баҳрайн ва Қатарга қарши баҳс олиб боради.