Олий лига. Ёнма-ён ўринларда бораётган жамоалар баҳси

Олий лига, 14-тур. 26 июнь
ПАХТАКОР - ОЛМАЛИҚ

Бош ҳакам: Дмитрий Пислегин
Бошланиш вақти: 19:20

Жадвалдаги ўрни: "Пахтакор" 7-ўринда (21 очко), "Олмалиқ" 8-ўринда (18 очко).
Очколар орасидаги фарқ - 3 очко.

Таъриф: Бу ўйинга бемалол турнир жадвалида ёнма-ён ўринларда бораётган жамоалар тўқнашуви таърифини берсак бўлади. Негаки "Пахтакор" еттинчи, "Олмалиқ" эса саккизинчи ўринни эгаллаб турибди. Тошкентда мазкур жамоаларнинг ўзаро баҳси доим қизиқ кечган ва бугун ҳам шундай бўлса ажаб эмас. Яна шуни айтиш мумкин, иккала жамоа ҳам мавсумни бир текис ўтказа олмаяпти. Имкониятлар борасида эса қайсидир томонни алоҳида ажратиб кўрсатиш қийин.

Факт: Ўз майдонида еттита учрашув ўтказган "Пахтакор" шундан бештасида зафар қучди. Жамоа бир бор дуранг ўйнаб, бир марта мағлубиятга учраган. Умуман олганда. "Пахтакор" охирги бешта баҳснинг учтасида ютқазиб, икки бор ғалабага эришди. 12-турда "Олмалиқ" жорий мавсум ҳисобидан сафардаги илк ғалабасини нишонлади. Бунгача сафарда олтита ўйин ўтказган Шквирин шогирдлари фақат мағлуб бўлишганди.

Эслатма: Кеча бўлиб ўтган "Пахтакор" - "Олмалиқ" (Ёшлар лигаси) баҳсида "пахтакорчилар" 2:0 ҳисобида зафар қучишди.