ОЛИЙ ЛИГА. "Локомотив" юқорига интилаётган "Бухоро"ни қабул қилади

Бугун эса турнинг навбатдаги тўртта ўйини ўтказилади. Шулардан бири ТТЙМИ стадионида "Локомотив" ва "Бухоро" жамоалари иштирокида кечади.

Олий лига, 11-тур. 11 июнь
ЛОКОМОТИВ - БУХОРО

Бошланиш вақти: 19:00
Ҳакам: Бахтиёр Намозов.

Турнир жадвалидаги ўрни: "Локомотив" 2-ўринда (28 очко), "Бухоро" 5-ўринда (18 очко)
Очколар орасидаги фарқ - 10 очко.

Таъриф: "Локомотив" олий лигада ҳам мағлубиятсиз одимини давом эттирмоқда. "Бухоро" эса бу йилги мавсумда ўзига хос жамоалардан бири бўлиб турибди. Йил бошида бухороликлар таркибни бир нечта яхши футболчилар эвазига кучайтириб олишди. Жамоа Кубок баҳсларидан "Пахтакор"ни чиқариб юборди. Бу ҳам "Бухоро"нинг кучаяётганидан дарак беради. Бугун жуда қизиқарли баҳс кечиши кутилмоқда. Негаки "Локомотив" мағлубиятсиз одимини давом эттиришга ҳаракат қилса, "Бухоро" кучли рақибга жиддий қаршилик кўрсатишга уриниб кўради.

Факт: "Локомотив" "Бунёдкор" билан бирга олий лигада мағлубиятга учрамаган жамоа бўлиб турибди. Жамоа ҳисобида 9та ғалаба ва бир дуранг бор. "Бухоро" эса ҳозиргача икки бор ютқазиб қўйди. Жамоа сафарда ҳозирча тўртта ўйин ўтказиб, шундан иккитасида зафар қучди. Уйдаги беллашувларда "Локомотив"нинг тўплар нисбати 12-1. "Бухоро"нинг сафар ўйинларидаги тўплар нисбати эса 3-4.

Эслатма: Кеча бўлиб ўтган "Локомотив" - "Бухоро" (Ёшлар лигаси) ўйинида бухороликлар 3:1 ҳисобида зафар қучишди.