Олег Зотеев: "Локомотив" бу ёшларининг нималарга қодирлигини очиб бериши керак"

- "Локомотив"га қайтганимдан хурсандман. Клуб янги лойиҳа тузмоқчи. Барча билиб турганидек, жамоада ёш футболчилар кўпчиликни ташкил қилмоқда. Балки "Локомотив"нинг Про лигага тушгани ҳам яхши бўлгандир. Чунки уларни ўстириш, ривожлантириш учун ушбу лига жуда мос. Бу йил Про лигани ютиб, кейинги йилга бошқа вазифаларни белгилаб олиш керак. 

Буни бир қадам ортга, икки қадам олдинга деса ҳам бўлади. Аммо бу борада олдиндан гапириш жуда қийин. Йилнинг биринчи ярмидан кейин хулоса чиқариш ҳам мумкин. 

- "Локомотив"дан кетганингиздаги ва ҳозирги таркибни солиштирадиган бўлсак, фарқ жуда катта. Таркибнинг ёшариши ҳақида қандай фикрдасиз?

- Ўшанда "Локомотив"да дейлик 20 футболчи бўлса, шулардан 18 нафари термага номзод футболчилар эди. Ҳозирги пайтда эса таркибда икки-уч нафар ёши катта футболчи бор. Қолган барча футболчилар эса ёшлар, тажрибаси, ўйин амалиёти кам, катта ўйинларни кўришмаган. Масалан, агарда жамоа Суперлигада қолганида бу ёшларга имконият камроқ бериларди. Про лига орқали "Локомотив" бу ёшларининг нималарга қодирлигини очиб бера олиши керак. Про лигада босим унчалик катта эмас, бемалол ўйнаса бўлади. Албатта, барчаси уларнинг ўзларига боғлиқ. Биз ёрдамни аямаймиз, доим қўллаб-қувватлаймиз. Агарда футболчилар ўз маҳоратини кўрсата олса, кейинги йил балки Суперлигада ҳам асосий таркибда кўпроқ ўйинга тушиши мумкин. Агарда Про лигада босим ҳис қилса, ўйинини кўрсата олмаса, ўша футболчилар таркибда қолмайди. 

- Анталия йиғинидан кўнглингиз тўляптими?

- Жуда яхши йиғин бўляпти. Кўп йиллардан буён бундай йиғинларда қатнашаман. Ҳатто Суперлиганинг бир қанча клубларида ҳам бундай йиғин бўлмаса керак. Яшаш шароитлари, машғулот учун майдонлар ажойиб. Ушбу йиғиндан кейин Тошкентга қайтамиз ва унда яна иккита босқич бўлади. Март бошида футболчиларнинг ҳолати ва ўйинларига қараб йиғинлар қандай ўтганини кўрсак бўлади. Аммо айта оламан, йиғинлар жуда зўр ўтмоқда.