“Нефтчи мухлислар гуруҳи”га марҳамат!

Айтиш керакки, “Нефтчи” ПФК ҳамда “Нефтчи” мухлислар жамоаси ўртасида яхши алоқалар йўлга қўйилган. Клуб мунтазам равишда фан-клуб аъзоларини қўллаб келади.  Давралар оралиғидаги танаффусдан фойдаланиб,  “БЕК” тахаллуси билан фарғоналик ишқибозларга танилган  “Нефтчи мухлислар гуруҳи” раҳбари Қудартилло Маҳмудов билан суҳбат қурдик.

–  Узоқ йиллардан бери жамоанинг ашаддий мухлисиман, – деб гап бошлади Маҳмудов – Шу сабабли қишда анчагина фаолияти оқсаб қолган “Нефтчи” фан-клубини  яна қайта тиклаш борасида ҳаракат бошладик. Клуб раҳбарлари ҳам бу борада бизга ёрдам беришди. Шукурки, ҳаракатлар бесамар кетмади. Жамоанинг ашаддий мухлисларини йиғиб “Нефтчи мухлислар гуруҳи”га асос солдик ва қўлдан келганча хар бир баҳсда “Нефтчи”га ишқибозлик қиляпмиз. Клубнинг молиявий қўллаб-қувватлаши натижасида, фан-клуб вакилларини махсус футболкалар билан таъминладик. Мамлакатимиздаги бошқа фан-клуб вакилларига алоқага чиқиб, улар билан дўстона муносабатларни ўртанишга интиляпмиз. Хуллас, бу борада самарали ишлар ҳали ҳамон давом этмоқда. Иккинчи даврада ҳам “Нефтчи мухлислар гуруҳи” сафини янада кенгайтириб, 12-ўйинчи сифатида жамоа ғалабаларига ҳисса қўшмоқчимиз.

–  Айтингчи, “Нефтчи мухлислар гуруҳи”га қўшилиш учун нима қилиш керак бўлади ?

–  Албатта мухлислар бевосита менга мурожаат қилишлари мумкин бўлади. Доим севимли жамоамизни қувончли ва оғир кунларида бирга бўлиш истагида бўлган, мухлислик маданиятига амал қиладиган ашаддий мухлисларни сафимизги чорлаб коламиз. Бунинг учун +998 93 982 10 82 рақамлари орқали алоқага чиқишлари мумкин. “Бунёдкор” билан ўйингача қабул жараёни давом этади, – деб фикрларини якунлади “Нефтчи мухлислар гуруҳи” раҳбари.