Мутолаа учун. Дунёнинг энг асосий вундеркиндларидан бири алдовда гумон қилинмоқда. Уни отаси сотди!

"Боруссия" (Дортмунд)нинг 18 ёшли ҳужумчиси Юссуфа Мукоко жаҳон футболининг бош иқтидорларидан биридир. Ёш форвард ҳақидаги гаплар 2017 йилда 12 ёшига кирганида Дортмунд клубининг 17 ёшгача бўлган жамоаси сафида "Шальке"га қарши дубль қайд этганидан бери давом этмоқда. Мукоко ўсмирлар даражасида ақлбоварқилмас статистикани қайд этди ва "Боруссия"нинг асосий жамоасига анча тез ўтди. Юссуфа "арилар" сафида 2020 йилда дебют қилди, ҳозирда унинг ҳисобида 44та ўйин ва 11та гол бор. Йигитчани ҳатто жаҳон футболининг асосий вундеркинди деб аташгани ҳам ажабланарли эмас.

Мукоконинг клуб билан шартномаси 2023 йилнинг ёзида якунланади. "Боруссия" олдинроқ ўйинчининг жамоадан кетишини тасдиқлади. Ҳужумчи учун бош даъвогарлар орасида "Ньюкасл", "Челси" ва "Барселона" клублари айтилмоқда. Аммо, вазиятга футболга алоқадор бўлмаган фактор ҳам аралашиши мумкин. Австриянинг Laola1 нашри Мукоконинг ҳақиқий ёши 22да эканлиги бўйича маълумотни эълон қилди. Юссуфа Камерун пойтахти Яундеда туғилган, 2014 йилда эса Германияга келган ва "Санкт-Паули" академиясига кирган. Мукоко ва унинг вакиллари ўйинчининг ҳақиқий ёшини яширган ҳолда, сохта ҳужжатлар тайёрлай олишган. 2022 йилда Юссуфа Мохамед номи билан 2000 йилга тегишли бўлган туғилганлик ҳақидаги гувоҳнома топилди. Таъкидланишича, ўйинчининг отаси гувоҳномани Австрия ОАВига юборган!

Ота-онанинг бундай зарба беришига нима ундаган бўлиши мумкин? Германиянинг Bild нашри Юссуфа ота-онаси билан жиддий жанжаллашгани ва улар билан гаплашмаётганини аниқлади. Мукоконинг оиласи билан келишмовчилиги сабаби шундаки, улар фақатгина ёш ўйинчининг пулига яшашган, футболчи эса уларни очкўзликда айблаган. Ўтган йилнинг ноябрида форварднинг ота-онасида муаммо пайдо бўлган: улар Гамбургдаги уй учун 1 миллион евродан ошиқроқ пул тўлашлари керак эди, йўқса уларни уйдан чиқариб юборишарди. Мукоко бу пулни тўлай оларди, аммо у ота-онаси билан икки йилдан ошиқ вақтдан бери гаплашмайди. Отанинг ўғлини матбуотга "бериб", ўзига хос тарзда қасос олганини истисно этиб бўлмайди.

Немис футбол иттифоқи (DFB) 2017 йилда ўйинчининг туғилган санаси 2004 йилнинг 20 ноябри кўрсатилган ҳужжат сохта эканлигини рад этди. Эндиликда Мукоконинг каттароқ ёшдаги жамоалар сафида ўйнаши фонида шубҳалар яна пайдо бўлиши мумкин.

"DFB Дортмунднинг "Боруссия" клуби билан музокаралар олиб борди. Фактларни синчиклаб кўриб чиқиш ҳақидаги сўровингизга биноан, "Боруссия"даги масъул шахслар қоғозлар ва ҳужжатларнинг ҳақиқийлигини эътироф этади. Мукоконинг ёши тўғрилигига ҳеч қандай шубҳа йўқ. DFB бу масала бўйича ўйинчининг клубдан маълумотларига таянади", — деб жавоб берди футбол иттифоқи матбуот хизмати Bild'нинг сўровига.

2017 йилда "Боруссия" U23нинг мураббийи Тимо Пройс Юссуфанинг ҳақиқий ёши 12да эканлигига шубҳа қилган эди. "Мукоконинг ёшини фақатгина тахмин қилиш мумкин. Балки бир ёки икки ёшга каттадир. Аммо, у аниқ 12да эмас. Уни айблашга ҳожат йўқ, бола алдамайди ёки шунга ўхшаш нарса", — деди менежер.

"Мукоко 12 ёшда. Бу факт, бунда ҳеч қандай шубҳа йўқ. У U17 жамоасида ўйнайди, сабаби бу унга спорт нуқтаи назарида мос келади" (Ларс Рикен — "Боруссия" ёшлар жамоаси координатори, 2017 йил).

Вазиятни Мукоконинг ватанида Камерун ёшлар терма жамоаси билан боғлиқ можаролар ҳам янада ёндирмоқда. Январь ойи бошида Камерун ёшлар терма жамоасининг 20дан ортиқ ўйинчилари ёшни аниқлаш учун зарур бўлган МРТ-тестлардан ўта олмагани маълум бўлди. Уларнинг барчаси тезда таркибдан олинди. Терма жамоа мураббийи Жан-Пьер Фиала тезда янги ўйинчиларни топди. Аммо, Фиалани жуда ҳам ҳайратлантирган нарса шу бўлдики, янги 11 футболчи ҳам ўз ёшидан катта эди. Воқеани Камерун футбол федерацияси президенти Самуэль Это'О изоҳлади: "Биз Камерун футболининг обрўсига путур етказаётган терма жамоадаги барча ёш манипуляциларига чек қўйишимиз керак".

Мукоконинг тақдири қандай кечиши қизиқ. "Ньюкасл" ва "Челси" "Боруссия" билан шартномаси 2023 йилнинг ёзида якунланадиган футболчини таклиф қилиш кераклигига шубҳа қилмоқда. Агар шубҳалар рост бўлиб чиқса, биз ёш билан боғлиқ энг катта фирибгарликлардан бирига гувоҳ бўлишимиз мумкин.

Championat.com сайтидан Алишер Остонов таржимаси