“Металлург” футболчилари тест синовларидан ўтишди

Бугун эрталабдан бекободликлар яна Қибрай ўқув-машғулот масканида тўпланишди ва Суперлига жамоалари олдига қўйилган асосий талаблардан бири – жисмоний тайёргарликни аниқловчи тест-синовларидан ўтишди. Ўзбекистон Футбол Ассоциациясининг Техник ривожлантириш бошқармаси илмий-методик гуруҳи мутахассислари педагогика фанлари номзоди, профессор Шамиль Исеев бошчилигида тўртта йўналиш бўйича футболчиларнинг ҳолатини назоратдан ўтказишди. 30 метрга югуриш, турган жойдан узунликка сакраш, 7х50 метрга югуриш ҳамда "Yo-Yo" тест машқларини “Металлург” футболчилари кўтаринки, хушчақчақ кайфиятда топширишди. Биринчи сафарги кўрикда футболчилар айниқса "Yo-Yo" тестида қийинчиликка дуч келишганди. Бу сафар эса “Металлург” ўйинчиларининг 70 фоиздан зиёдроғида муаммо бўлмади. Ўз навбатида текширув гуруҳи вакиллари ҳам жамоанинг ҳолати мўътадиллашганини, мавсум бошланишига қадар оптимал ҳолатга кўтарилишини таъкидлашди. Тест-синовлари якунлари ЎФА методик марказида таҳлил этилгач, баён этилади.

“Металлург” футболчилари эса эртадан яна икки маҳаллик машғулотлар жараёнини давом эттиришади. Ўз навбатида 14 февралда “Нефтчи”, 17 февралда эса “Сўғдиёна” билан назорат учрашувларида куч синалишини ҳам айтиб ўтмоқчимиз. Кўрик ўйинлари Қибрай базаси майдонларида бўлиб ўтади.