Мессининг ЖЧ-2022даги 6та футболкаси аукционда 10 млн. доллардан кўпроққа сотилишини кутишяпти

Ню-Йоркдаги Sotheby’s аукционида аргентиналик ҳужумчи 2022 йилги жаҳон чемпионатида ўйнаган 6 та футболка ким ошди савдосига қўйилади. Тўпламда гуруҳ босқичининг иккита ўйини, 1/8 финал, чорак финал, ярим финал ва финалнинг биринчи ярмидан олинган Мессининг футболкалари жой олади.

Футболкалар тўпламининг якуний нархи камида 10 миллион доллар (8 миллион фунт) бўлиши кутилмоқда. Ҳозирда спорт билан боғлиқ энг қиммат буюм Майкл Жорданнинг 1998 йилги NBA финалидаги 1-ўйин формаси ҳисобланади. У кимошди савдосида 8,1 миллион фунт стерлингга сотилган эди.

Диего Марадонанинг ЖЧ-1986 чорак финал либоси аноним харидорга 7,1 миллион фунт стерлингга тушган.

“2022 йилги футбол бўйича жаҳон чемпионати спорт тарихидаги энг буюк воқеалардан бири Мессининг қаҳрамонлик йўли билан узвий боғлиқ бўлиб, унинг барча даврларнинг энг буюк футболчиси мақомини мустаҳкамлайди.

Ушбу олтита футболканинг сотилиши ким ошди савдолари тарихидаги монументал воқеа бўлиб, мухлислар ва коллекционерларга Мессининг карьерасини белгиловчи ютуғидан баҳам кўриш имкониятини беради. Sotheby’s компанияси футбол мукаммаллиги чегараларини қайта белгилаган ўйинчининг ажойиб истеъдодини ўзида мужассам этган ушбу бебаҳо коллекцияларни оммага тақдим этишни шараф деб ҳисоблайди", - деди Sotheby’s замонавий коллекциялар бўлими раҳбари Брам Вахтер.

Қайд этилишича, Мессининг футболкалари коллекциясини сотишдан тушган маблағнинг бир қисми хайрия ишларига йўналтирилади.